Alertan sobre as consecuencias na nova Política Agraria Común (PAC) no rural lugués
Sarria acolleu o 9 de abril a xornada “O futuro de Lugo na Política Agraria Común 2014-2020”, organizada polo PSdeG de Lugo para dar continuidade ao programa de mesas sectoriais iniciado en xaneiro para coñecer as fortalezas e debilidades dos principais sectores produtivos, e deseñar un plan de traballo conxunto que permita impulsar a nosa provincia. Según explicaron os socialistas, cos novos criterios de reparto da Política Agraria Común (PAC), o importe medio percibido polos 2.000 beneficiarios da comarca que, no período anterior se situaba nos 5.700 euros, no vindeiro sexenio reducirase un 9%. Isto supón unha diminución na contía das axudas de máis de 500 euros anuais por gandeiro. Aparte da merma na economía dos afectados, xa que as axudas da PAC representan o 60% da renda das granxas de carne e o 30% nas lácteas, a reforma duplicará o risco de dumping no leite con prácticas comerciais agresivas doutros países. O secretario xeral do PSdeG, José Ramón Gómez Besteiro, criticou que “en vez de negociar uns criterios de reparto da PAC xustos e equitativos, Feijóo traizoou os intereses dos galegos, como fixo coa reforma eléctrica, as primas ás renovables, a reforma local ou repago sanitario”. Pola súa banda, José Blanco comprometeuse cos gandeiros e produtores da comarca a pedir na Eurocámara que na reforma da PAC se revise o límite das axudas, se primen as 25 primeiras hectáreas e se compense a desaparición da cota láctea en 2015.•
