A Xunta organizou máis dun cento de actos para dar a coñecer a obra do autor lucense

• Este ano terá lugar a I Carreira Camiño das Letras, para conmemorar esta data e poñer en valor o Camiño de Santiago a través do deporte •A exposición itinerante “Nimbos de luz” chegará a 15 concellos de toda Galicia

As Letras Galegas viaxan este ano á provincia de Lugo, para homenaxear a un fillo de Guitiriz, poeta, tradutor e intelectual. Xosé María Díaz Castro centra a atención dos máis dun cento de actos que a Xunta de Galicia ten programados por toda a xeografía galega, en colaboración coa Real Academia Galega, o Consello da Cultura Galega, o Concello de Guitiriz, o Centro Pen de Galicia, a Asociación de Escritores e Escritoras en Lingua Galega e Xermolos. O obxectivo desta programación é achegar a figura e a obra de Díaz Castro ó conxunto da cidadanía e a todos os niveis, tanto á poboación escolar como ó público en xeral, dentro e tamén fóra de Galicia.

DIVULGACIÓN DA OBRA DE DÍAZ CASTRO NOS SUPERMERCADOS VEGALSA-EROSKI
Durante o mes de maio, os establecementos da compañía galega de distribución alimentaria Vegalsa-Eroski están a mostrar un total de 1.000 cartaces conmemorativos desta celebración. A ilustración escollida pertence ó traballo do CEIP Lagostelle de Guitiriz, gañador do Concurso-Exposición Letras Galegas 2014. Asimesmo, estes supermercados entregarán máis dun millón de bolsas de edición especial con versos de “Nimbos”, a obra máis importante de Díaz Castro.

DEPORTE NAS LETRAS GALEGAS E NO CAMIÑO DE SANTIAGO
A celebración deste ano do Día das Letras Galegas conta cunha novidade vinculada ó deporte e á tradición xacobea. O domingo 18 de maio ás 10,30 horas partirá de A Lavacolla a I Carreira Camiño das Letras, unha carreira popular que seguirá o trazado da histórica ruta ata o Monte do Gozo, e que premiará a cada participante cun libro e co diploma Camiño das Letras. Haberá ademais diversas modalidades de premios. Entre elas, os gañadores absolutos e os vencedores de cada categoría desta proba, integrada no calendario oficial da Federación Galega de Atletismo, recibirán un trofeo, e o centro escolar con maior participación acadará un trofeo e un lote de libros.

DIVULGACIÓN NOS CENTROS DE ENSINO
O Concurso-Exposición Letras Galegas premiou nesta edición o traballo “Esmeralda”, do CEIP Plurilingüe Lagostelle de Guitiriz, na modalidade de Primaria, e “Sombras radiantes”, do IES Perdouro de Burela, na categoría de Secundaria. Estas exposicións imprimiranse e distribuiranse polos centros de ensino galegos para dar a coñecer a obra de Díaz Castro.
Ademais, os equipos de dinamización lingüística están a realizar diversas actividades en torno á creación do poeta guitiricense, e os centros de ensino poderán dispoñer do documental “Nimbos de poesía”, realizado por Xulio Xiz, e das unidades didácticas elaboradas polo estudioso da obra diazcastriana, Armando Requeixo. Pola súa banda, as bibliotecas e museos dependentes da Consellería de Cultura e Educación están a organizar diversas conferencias e proxeccións audiovisuais sobre a importancia da obra do autor homenaxeado.
Fóra de Galicia, os centros culturais e os lectorados de galego inclúen diversas actividades sobre as Letras Galegas 2014. En Euskadi, esta efeméride será celebrada en Urretxu, localidade onde residiu Díaz Castro durante a súa estadía no País Vasco.

“NIMBOS”, MOSTRA ITINERANTE
O título da obra máis representativa de Xosé María Díaz Castro dá título a unha mostra itinerante que está a percorrer unha quincena de concellos. “Nimbos de luz”, comisariada por Alfonso Blanco Torrado, Luís González Tosar e Armando Requeixo, permite aproximarse á obra do guitiricense por medio de 14 paneis temáticos. Como complemento ofrece, de xeito gratuíto, folletos ilustrativos dos paneis e a proxección do documental “O instante eterno”, de Xosé Antón Cascudo.
Por último, Guitiriz será o epicentro das celebracións do Día das Letras Galegas, con diversos actos para honrar a figura dun dos seus fillos máis ilustres.•