•Sendeirismo, música e conferencias compoñen este programa de actos •Foi presentada a “Guía del Camino de Invierno a Santiago”, escrita por Aida Menéndez

• Pantón arrincou este mes co programa de actividades das XXVII Xornadas da Rota do Románico, que incluíron ata agora unha ruta de sendeirismo, charlas e a presentación da obra de Aida Menéndez “Guía del Camino de Invierno a Santiago”. Os eventos continuarán o 8 de xuñó, coa III edición da Sinfonía no Mosteiro, que ofrecerá, a partir das 19 horas na igrexa do Mosteiro das Bernardas de Ferreira, un recital de poesía a cargo de Mar Sabater baixo o título “Cuasi amorosas, mitos y otros poemas”, seguido da actuación do dúo de cámara Deva, de frauta traveseira e buzuki. O 20 de xuño, o periodista e fotógrafo editorial José Salgado ofrecerá a conferencia “Asinado na pedra: as marcas de canteiro na arquitectura medieval galega”, a partir das oito da tarde no Salón de Actos do Concello.
As actividades do día 22 versarán sobre “Galicia Monumenta: Á descuberta do Patrimonio”, comezando coa ruta de sendeirismo “Andar con Arte”, ás 10 horas. Ás 17 horas, o Mosteiro das Bernardas de Ferreira será o escenario do “Faladoiro Monumenta: O cego de Eiré”, que seguirá cun espacio musical baixo o título “Monumenta en concerto”, coa actuación da intérprete Alba María, acompañada de Óscar Fernández á zanfona.•