O IES Lama das Quendas seguirá a reclamar a Educación a sección de inglés da Escola Oficial de Idiomas

O equipo directivo entende que «é unha demanda social da comarca de Chantada»

•Dende a Dirección comunicaron que xa son 50 as persoas adultas que fixeron unha preinscrición non oficial no centro chantadino para cursar inglés no vindeiro curso

Foto de arquivo da visita do deputado socialista no Parlamento de Galicia, Vicente Docasar, e da coordinadora comarcal do PSdeG no suroeste de Lugo, Pilar García Porto, ó IES Lama das Quendas de Chantada, o pasado mes de marzo, para apoiar a demanda do equipo directivo de acoller neste centro unha sección de inglés da Escola Oficial de Idiomas de Monforte.  Arquivo EC.
Foto de arquivo da visita do deputado socialista no Parlamento de Galicia, Vicente Docasar, e da coordinadora comarcal do PSdeG no suroeste de Lugo, Pilar García Porto, ó IES Lama das Quendas de Chantada, o pasado mes de marzo, para apoiar a demanda do equipo directivo de acoller neste centro unha sección de inglés da Escola Oficial de Idiomas de Monforte. Arquivo EC.

• Chantada segue a reivindicar o ensino de idiomas para a capital comarcal. O pasado 20 de maio, o equipo directivo do IES Lama das Quendas fixo público un comunicado no que criticaba que «o Partido Popular rexeite de momento» a posibilidade de abrir neste centro chantadino unha sección de inglés da Escola Oficial de Idiomas «en contra da opinión de toda a oposición, e a pesar de que xa son 50 as persoas adultas que fixeron unha preinscrición non oficial» neste instituto para poder cursar inglés neste centro no curso 2014-2015.

ACHEGAR A APRENDIZAXE DO INGLÉS Á CONTORNA DE CHANTADA, E OPTIMIZAR AS INSTALACIÓNS DO INSTITUTO
No seu comunicado, a Dirección do IES Lama das Quendas lembraba a solicitude que cursou á Consellería de Cultura, Educación e Ordenación Universitaria o pasado mes de xaneiro, para que se implantará unha sección da Escola Oficial de Idiomas de Monforte de Lemos, na especialidade de lingua inglesa, no concello de Chantada, e con sede no citado instituto. O obxectivo que a Dirección do centro pretendía con esta solicitude era doble. Por unha banda, «achegar a posibilidade da aprendizaxe de inglés á poboación adulta da contorna», e por outra, «facer máis eficiente o funcionamento do centro en xornada de tarde». Explicaban que nestes momentos o centro está aberto todos os días pola tarde «só para dous grupos de Educación Secundaria de Adultos e dous grupos do programa CUALE, o que supón que o resto do centro está sen utilizar».

A POBOACIÓN ADULTA DE CHANTADA, «EXCLUÍDA» DA APRENDIZAXE DE IDIOMAS
En canto á aprendizaxe de idiomas, insisten dende o instituto na necesidade desta nova sección. «A pesar de que o IES Lama das Quendas en ofertando dende hai moitos anos o programa CUALE, na actualidade só se pode ofertar ó alumnado de 3º e 4º de ESO, Bacharelato e ciclos formativos, quedando excluída o resto da poboación». A Dirección do centro ten clara a utilidade desta sección de inglés, xa que «todos os anos o centro está a recibir demandas de xente interesada en aprender inglés, sobre todo xente adulta, pero temos que remitilos á Escola Oficial de Idiomas de Monforte».
O inevitable desprazamento a Monforte, unido á actual situación de crise económica, fan que moitas persoas desistan de estudar este idioma. «Sería de moito interés achegar a oferta deste servizo á poboación que o demanda». Esta decisión do equipo directivo conta co apoio do Claustro de profesores do IES Lama das Quendas e do seu Consello Escolar. Asimesmo, os Plenos dos Concellos de Chantada, Taboada e Carballedo aprobaron por unanimidade acordos en apoio desta demanda.
O ÚNICO CUSTE ADICIONAL SERÍA O SOLDO DO PROFESOR, XA QUE AS INSTALACIÓNS ESTÁN OPERATIVAS A DIARIO
A Dirección do centro precisa que esta iniciativa «só lle suporía a Educación o custe do soldo dun profesor de inglés, porque as instalacións e recursos como calefacción, vixiancia ou electricidade son os do propio centro, que abre polas tardes a diario». O comunicado emitido pola Dirección do IES Lama das Quendas precisa que «desde o centro non se entende que o Goberno galego traslade a idea de que a importancia do inglés é cada día maior, e en cambio non dé a posibilidade da súa aprendizaxe á cidadanía galega do rural, non só aos alumnos de ESO e Bacharelato, senón ao resto da poboación que non cursa ensinanzas ordinarias».
Con todo, os responsables do centro suliñaron que «o IES Lama das Quendas vai seguir solicitando devandita formación xa que é unha demanda social da comarca».•

Deixa unha resposta

Your email address will not be published.

Nova Anterior

A Unidade Asistencial de Drogodependencias de Monforte realizará test rápidos en fluido oral para detección do VIH

Seguinte Nova

En marcha as XXVII Xornadas da Rota do Románico de Pantón

Últimas noticias sobre CULTURA

Maika Makovski

Unha das actuacións estelares do 17º Ribeira Sacra Festival Onte arrincou unha nova edición do 17º

A %d blogueros les gusta esto: