A capital provincial acolleu a feira Ecolugo

•A facturación deste sector o ano pasado achegouse ós 26 millóns de euros •O volume de negocio en produción ecolóxica certificada medrou en máis dun 11% en 2013

• A capital provincial celebrou a feira Ecolugo a finais do mes pasado, nunha cita onde postos de produción ecolóxica de diferentes puntos de Galicia deron a coñecer o seu traballo ós consumidores lucenses. O sector da produción ecolóxica en Galicia está a vivir un constante crecemento nos últimos anos, e a nosa provincia participa de xeito destacado no pulo do sector, ó acoller o 45% da superficie adicada á produción ecolóxica de toda Galicia.

IMPORTANCIA DAS EXPORTACIÓNS PARA O PULO DA PRODUCIÓN ECOLÓXICA
Con esta referencia, a delegada territorial da Xunta en Lugo, Raquel Arias, destacou o “pulo” da produción certificada na nosa comunidade. Arias visitou a feira Ecolugo, e lembrou que a facturación en Galicia no sector da produción ecolóxica achegouse no pasado ano aos 26 millóns de euros. Asimesmo, o volume de negocio de vendas certificadas en ecolóxico medrou en máis dun 11%, ao pasar de máis de 23 millóns de euros en 2012 a 25.916.446,78 euros no 2013. “Neste crecemento teñen un papel clave as exportacións, que supoñen a apertura de novas oportunidades de negocio, xa que os produtos ecolóxicos de Galicia teñen cada vez máis aceptación nos mercados estranxeiros”, asegurou Arias.

MEDRA A PROFESIONALIZACIÓN DO SECTOR
A representante do Executivo galego na nosa provincia fixo referencia tamén ó “incremento da profesionalización desta actividade”, a través do ascenso da cifra de operadores e da superficie rexistrada. Este panorama, indicou Raquel Arias, demostra que é un sector potencial e de futuro para a incorporación de xente nova. Ademais, a delegada da Xunta en Lugo lembrou que a Unión Europea aposta claramente por esta vía, o que se pon de manifesto en toda a normativa que a regula.
Raquel Arias destacou o dato de que o Consello Regulador da Agricultura Ecolóxica de Galicia (CRAEGA), organismo encargado de controlar este sistema de produción de alimentos agrícolas, aumentase a cifra de operadores, que pasou de 607 a 656 no último ano, o que se traduce nun incremento do 8%. •