Presentaron a Guía Virtual do Camiño Francés a Santiago, e a visita virtual en 360º a esta mostra
• A quinta edición da mostra Artistas e Artesáns da Comarca de Sarria no Camiño está a contar cunha gran aceptación. Dende a súa apertura o pasado 2 de maio, a mostra instalada no edificio do Antigo Cárcere foi visitada por preto de 6.000 persoas. “Aínda que hai menos venda que outros anos, temos moitos máis visitantes, que ademais amosan moito interés polos traballos presentados, e isto fai que os artesáns e artistas estén satisfeitos pola atención que se lles mostra ó seu traballo”, explica Jorge López, presidente da Asociación de Amigos do Camiño Francés na Comarca de Sarria, colectivo organizador desta exposición.
A mostra recibiu visitas de grupos de escolares, e tamén de representantes institucionais. O pasado 4 de xuño, o presidente da Mancomunidade de Municipio do Camiño Francés e alcalde de Pedrafita do Cebreiro, José Luis Raposo, visitou a exposición acompañado do concelleiro de Cultura de Sarria, Francisco López. Durante esta visita, conversaron con diversos artesáns, que explicaron as características dos seus traballos, e asistiron á presentación da Guía Virtual do Camiño Francés a Santiago e da visita virtual en 360º a esta exposición, realizada pola empresa lucense Gusuguito.•
