Gadis e Fademur adheríronse a esta campaña

• Segue en marcha a campaña de apoio á candidatura da Ribeira Sacra a Patrimonio da Humanidade, e que acaba de sumar este mes dúas novas adhesións. A firma Gadis fixo oficial o seu apoio a esta campaña, impulsada pola Deputación de Lugo, nun acto celebrado o pasado 10 de xuño en San Clodio. Neste evento tamén deu a coñecer a súa adhesión a esta iniciativa o colectivo Fademur (Federación de Asociacións de Mulleres Rurais).

GADIS PARTICIPARÁ NA CAMPAÑA RECOLLENDO SINATURAS EN 51 ESTABLECEMENTOS E A TRAVÉS DAS REDES SOCIAIS
Según explicou o director de Márketing de Gadisa, Antonio Cortés, “en Gadis gústanos estar ó lado das persoas”, polo que “dentro do noso plan de sostibilidade corporativa imos recoller sinaturas nos nosos establecementos e a través das nosas redes sociais, que teñen 130.000 seguidores”. Deste xeito, un total de 51 establecementos de Gadis nas provincias de Lugo e Ourense disporán ata o 31 de xullo de libros oficiais da Unesco para recoller sinaturas en apoio da candidatura da Ribeira Sacra a Patrimonio da Humanidade.

FADEMUR OFRECERÁ ÁS 12.000 MULLERES ASOCIADAS A POSIBILIDADE DE FIRMAR EN APOIO DESTA CANDIDATURA, E INCLUIRÁ A INICIATIVA NA SÚA CAMPAÑA “SON DE CAMPO”
Pola súa banda, a presidenta de Fademur, Rosa Arcos, afirmou en San Clodio que “para nós a Ribeira Sacra é a esencia do medio rural no que cremos, modelo de sustentabilidade e onde o xeito de traballar das mulleres contribúe a mantelo”. Fademur aglutina en Galicia a 74 asociacións con máis de 12.000 mulleres representadas, que agora poderán rexistrar a súa sinatura en apoio da candidatura da Ribeira Sacra. Asimesmo, a presidenta deste colectivo de mulleres rurais anunciou que van incorporar esta iniciativa á súa campaña denominada “Son de campo”, que ten como obxectivo dar visibilidade á produción do rural.

“SEGUIR SUMANDO APOIOS” Á CAMPAÑA QUE XA CONTA CON MÁIS DE 10.000 FIRMAS
A campaña de recollida de firmas en apoio da candidatura da Ribeira Sacra a Patrimonio da Humanidade foi posta en marcha o pasado 8 de outubro, impulsada pola Deputación de Lugo. Esta iniciativa ten xa rexistradas máis de 10.000 firmas en apoio desta candidatura. O presidente do organismo provincial, José Ramón Gómez Besteiro, apuntou en San Clodio que o obxectivo é “seguir sumando apoios, xa que a Humanidade merece seguir sumando patrimonio como a Ribeira Sacra e as súas capacidades”.•