A Plataforma Sarriana polo Río denuncia ante a Comisión Europea o encauzamento do río Sarria

• O pasado 19 de xuño, a Plataforma Sarriana polo Río deu a coñecer a presentación dunha denuncia diante da Comisión Europea polos incumprimentos do Dereito Comunitario detectados por este colectivo no proxecto e nas obras de encauzamento do río Sarria.
Según informaron dende a Plataforma, a denuncia vai dirixida contra o Ministerio de Agricultura, Alimentación e Medio Ambiente; a Confederación Hidrográfica Miño-Sil; a Consellería de Medio Ambiente e a Consellería de Cultura, así como Augas de Galicia e o Concello de Sarria.
A denuncia está motivada pola afección das obras proxectadas e xa en execución a varios hábitats cualificados pola normativa oficial como prioritario de interés comunitario. Na súa denuncia ante a Comisión Europea, a Plataforma Sarriana polo Río argumenta que se encontran afectados por estas actividades os bosques aluviais de freixos e ameneiros, o bosque de ribeira que acompaña ó río Sarria ó longo do seu percorrido, e o hábitat de diversas aves protexidas como de interés comunitario.
Asimesmo, o escrito da Plataforma denuncia a afectación dun corredor ecolóxico recoñecido na directiva de hábitats, que conecta o Lugar de Importancia Comunitaria (LIC) Ancares-Courel coa Reserva da Biosfera Terras do Miño. A denuncia concreta tamén a afectación dunha paisaxe de “enorme significación histórica e cultural”, nun tramo do Camiño de Santiago e no seu ámbito de territorio histórico integrante do Ben de Interés Cultural (BIC) Camiño Francés a Santiago.
O texto da denuncia presentada pola Plataforma Sarriana en Bruxelas inclúe unha denuncia polos “defectos e omisións da evaluación ambiental do proxecto” e, especialmente, do feito de que a Resolución sobre a evaluación ambiental “ignore completamente a existencia de paisaxes con significación histórica e cultural, como o caracterizado pola presencia do Camiño de Santiago, ó considerar a sensibilidade medioambiental da área afectada”. Unha destas infraccións refírese ó calendario de obra dos traballos, que debería estar deseñado para “evitar as accións máis impactantes durante o periodo de cría e nidificación da avifauna”, feito recoñecido como infracción no Dereito Comunitario.
Outro dos aspectos rexistrados na denuncia da Plataforma é o relativo ó incumplimento da normativa sobre xestión de residuos, así como “varios episodios de verquidos ó río”, dos que aportan material gráfico e audiovisual integrado na documentación enviada á Comisión Europea.
Por último, este colectivo denuncia incumplimentos da Directiva relativa ó acceso do público á información medioambiental, e da Directiva relativa á evaluación e xestión dos riscos de inundación.
Dende a Plataforma suliñaron que un dos aspectos polo que se interesa a Comisión Europea no seu formulario de denuncia é a existencia ou non dunha financiación comunitaria da que puidera beneficiarse o Estado membro en relación cos feitos imputados. Neste caso, a Plataforma declarou que este proxecto conta efectivamente con financiación europea, posto que o proxecto está financiado nun 80% por fondos FEDER, “financiación que podería verse comprometida polos incumplimentos do Dereito Comunitario denunciados diante da Comisión Europea”. •