•O Concello de Quiroga promove o Plan de Emprego Xuvenil por segundo verán consecutivo

O 30 de xuño tivo lugar no Concello de Quiroga a sinatura dos contratos correspondentes ó Plan de Emprego Xuvenil, que este ano cumple a súa segunda edición. No acto estiveron presentes o alcalde de Quiroga, Julio Álvarez, e os 14 mozos e mozas beneficiarios desta iniciativa municipal de creación de emprego.

O PLAN DE EMPREGO XUVENIL BENEFICIA ESTE ANO A 14 MOZOS E MOZAS DE QUIROGA
O Concello de Quiroga, a través do Departamento de Xuventude, puxo en marcha o pasado ano este novidoso Plan de Emprego destinado á mozos e mozas menores de 30 anos, estudantes universitarios ou de ciclos formativos, e que durante o curso escolar residan fóra do municipio, e os ingresos familiares non superen a media da renda per capita familiar.
Estes contratos serán de carácter temporal, durante os meses de verán, cunha xornada parcial. Os estudantes substituirán ós funcionarios e persoal municipal que disfruten das súas vacacións de verán. Os mozos e mozas contratados desempeñarán as súas funcións nos diversos departamentos municipais .

AXUDAR ÁS FAMILIAS QUE TEÑEN FILLOS ESTUDIANDO FÓRA, E OFRECER A ESTES EXPERIENCIA LABORAL
Os obxectivos do Plan de Emprego Xuvenil de Quiroga son, por unha banda, colaborar coas familias que están a facer un esforzo económico para soster a formación dos seus fillos e fillas fóra do municipio. Por outra banda, o Plan de Emprego Xuvenil facilita ós beneficiarios unha experiencia laboral necesaria para enriquecer o seu currículo profesional.•