Inclúe a creación do primeiro centro público de produción apícola do noroeste de España

•Presentado o Plan Integral para activar a finca de Tor •As máis de 180 hectáreas desta finca de titularidade pública acollerán dende unha granxa cinexética ata un viveiro de árbores, e se potenciará a formación en agricultura ecolóxica

• A posta en valor da finca de Tor, de titularidade pública, como centro referente da promoción económica do rural en Galicia é o obxectivo do Plan Integral presentado pola Deputación de Lugo o pasado 22 de xullo. O presidente do organismo provincial, José Ramón Gómez Besteiro, explicou esta iniciativa nas instalacións de Tor, acompañado polos representantes das asociacións de caza da provincia, o presidente do Consello Regulador da Agricultura Ecolóxica de Galicia, e o da Asociación Galega de Apicultura, entre outros. O mandatario provincial cualificou de “ambicioso e innovador” o proxecto para converter as máis de 180 hectáreas da finca de Tor no “no centro público de Galicia coa oferta máis ampla dedicada á promoción económica do rural”.

CARACTERÍSTICAS DO PLAN INTEGRAL PARA TOR
Na súa intervención, Gómez Besteiro explicou que o Plan Integral, no que o organismo provincial investirá 885.000 euros, implica a redistribución dos terreos da finca de Tor e os seus usos, que se concretarán en cinco proxectos. O mandatario provincial suliñou que este Plan é o resultado de “moitos meses de traballo”, e adiantou que esta posta en valor da finca de Tor vaise convertir “nunha das insignias desta institución”.

A CAZA XERA PRETO DE 30 MILLÓNS DE EUROS Ó ANO
Un total de 20 hectáreas, integradas na finca principal do espazo de Tor, acollerá unha granxa cinexética para a cría de perdiz e coello de monte. Según precisou o mandatario provincial, o primeiro paso neste proxecto será a implantación de 80 parellas de perdices, e a previsión é que chegue ás 400 cando a granxa se consolide. Neste sentido, a Xunta de Goberno posterior ó anuncio do Plan Integral de Tor aprobou o anteproxecto da primeira fase das obras, dotado de 525.816 euros. En canto ós prazos de execución, Besteiro precisou que dependerán da resolución das licencias que o organismo provincial vai solicitar ó Concello de Monforte e ás demais administracións competentes.
O proxecto da granxa cinexética de Tor está en consonancia con outra das apostas da Deputación de Lugo neste sector, concretada na sala de despece de produtos cinexéticos que o organismo provincial está a piques de rematar no municipio de A Fonsagrada. Gómez Besteiro salientou que esta é a primeira sala destas características con titularidade pública en Galicia, e que, xunto co proxecto de Tor, baséase na importancia que ten a caza na nosa provincia. Lugo conta con 11.000 cazadores federados, que supoñen o 22% do total de Galicia, e a actividade cinexética está a xerar preto de 30 millóns de euros ó ano. Ademais, Lugo é a provincia con máis tecores dentro da nosa Comunidade Autónoma. Os 152 tecores que hai en Lugo ocupan un total de 8.900 quilómetros cadrados, o que supón o 90% do territorio lucense.
De xeito complementario a este proxecto, o Plan Integral reserva 13,5 hectáreas da finca de Tor para cultivo de cereal, que abastecerá en parte as necesidades da granxa cinexética. Con este fin, o Plan destina un investimento inicial de 17.351 euros.

APOIO Ó SECTOR APÍCOLA LUCENSE, QUE XERA 4 MILLÓNS ANUAIS
A redistribución da finca de Tor establecida no Plan Integral destina 5.000 metros cadrados a un centro apícola, que será o primeiro de titularidade pública do noroeste de España. O obxectivo deste proxecto é abastecer de enxames ós preto de 1.700 apicultores da provincia. Gómez Besteiro lembrou que o sector apícola xera preto de 4 millóns de euros ó ano na provincia de Lugo, e anunciou que a primeira fase dos traballos deste centro, dotada con 32.331 euros, comezarán despois do verán.

VIVEIRO DE ÁRBORES
Un total de 10 hectáreas da finca de Tor destinaranse a viveiro de especies arbóreas autóctonas, que se convertirá no espazo público destas características máis grande da provincia. Este proxecto ten asignado un orzamento inicial de 49.304 euros.

POTENCIAR O ESPAZO FORMATIVO DA FINCA DE TOR
Por último, o Plan Integral para a finca de Tor busca potenciar o espazo para formación e práticas que xa existe neste emprazamento, no que a Deputación lucense estivo a desenvolver nos últimos meses o programa “Fórmate en Verde” sobre agricultura ecolóxica. Esta área ocupa un total de 9 hectáreas, e dispón de aulas homologadas.
A finca de Tor integra ademais unha parcela de 118 hectáreas de produción silvícola, actualmente en fase de recuperación. Ademais, inclúe 9 hectáreas con lagoas que sirven de hábitat a varias especies de aves acuáticas e proveen de auga para o rego dos cultivos. Por último, as naves coas que contaba a finca de Tor, antes empregadas para o gando vacún, destinaranse ós novos usos das parcelas.

“O PLAN INTEGRAL SALDA UNHA DÉBEDA HISTÓRICA”
Na súa exposición do Plan Integral, o presidente da Deputación fixo referencia ás “numerosas e gravísimas irregularidades que nos atopamos en Tor ó chegar ó Goberno”, e que houberon de resolver para saldar “unha débeda histórica coa provincia”. Gómez Besteiro explicou que o Goberno provincial adicou estes últimos anos a solucionar a situación herdada con diversas medidas, avaladas polas dúas primeiras sentencias do Tribunal Superior de Xustiza de Galicia, ditadas este mesmo ano. Ademais, o mandatario provincial lembrou que a Fiscalía mantén abertas varias investigacións sobre a xestión que fixo desta entidade o anterior Executivo provincial do Partido Popular. Besteiro culificou esta xestión como “un dos maiores ataques medioambientais ocorridos na provincia”, en alusión ás talas masivas, morte de numerosos animais e cazas ilegais que, entre outros feitos, foron detectados neste espazo. Logo de numerosos procesos legais e administrativos, en 2009 quedou liquidada a anterior Fundación Tor, regularizándose a situación.•