A cifra de turistas internacionais na Ribeira Sacra medrou un 16,5% no primeiro semestre do ano

• A Ribeira Sacra «é un destino cada vez con maior demanda entre os viaxeiros que veñen a Galicia». Así o destacou a directora de Turismo de Galicia, Nava Castro, o pasado 28 de xullo en Monforte, onde asinou co presidente do Consorcio de Turismo Ribeira Sacra, Juan Carlos Armesto, un convenio para a promoción da Ribeira Sacra.

TRADUCIÓN DE GUÍAS, DA APP DE SENDEIRISMO E MÁIS DIVULGACIÓN
Según explicaron trala firma do convenio, no que estiveron presentes os delegados territoriais da Xunta nas provincias de Lugo e Ourense, Raquel Arias e Rogelio Martínez, a aportación que fai Turismo de Galicia é de 110.000 euros, sobre un total de 140.000. Grazas a este convenio, o Consorcio poderá desenvolver actividades relacionadas coa promoción, dinamización e fomento do turismo na zona. Os responsables deste acordo precisaron que o convenio financiará a realización de actividades relacionadas cos soportes de información e a ampliación do ámbito de cobertura da información a través da tradución de guías da Ribeira Sacra, da app de sendeirismo, ou a cobertura das necesidades de material das oficinas de turismo, así como a divulgación da accesibilidade a recursos e actividades.

ACCIÓNS DE APOIO Á CANDIDATURA DA RIBEIRA SACRA, E PULO ÓS RECURSOS EN LIÑA
Ademais, o importe destinarase á ampliación do banco de imaxes audiovisuais do destino, á creación de contidos para as redes sociais, a accións de apoio á candidatura da Ribeira Sacra a Patrimonio da Humanidade. Do mesmo xeito, realizaranse actuacións dirixidas á creación de produto, á formación do sector en relación coas redes sociais e os recursos en liña, así como o posicionamento en liña das empresas turísticas.
O acordo inclúe tamén actuacións de sinalización e eliminación de feísmos de sinalización; así como de comercialización e promoción do produto turístico Regala Ribeira Sacra, a divulgación da imaxe do destino baseada na calidade e no posicionamento dos produtos Ribeira Sacra nas axencias de viaxe.

O 31% DA DEMANDA HOTELEIRA FOI EXTRANXEIRA
Según explicou a directora de Turismo de Galicia, no primeiro semestre do ano, o mercado nacional na Ribeira Sacra experimentou unha suba do 22,2% e o mercado internacional incrementouse un 16,5 %, tendo en conta as pernoitas rexistradas por ambos segmentos do mercado en comparación co primeiro semestre do ano pasado. Nava Castro precisou que “o peso do turismo internacional entre xaneiro e xuño é na Ribeira Sacra do 31% do total da demanda hoteleira”.•