Un total de oito voluntarios están a desenvolver en Quiroga diversas actividades de carácter lúdico e formativo, dentro do programa de Voluntariado Xuvenil da Xunta de Galicia.
ACTIVIDADES PARA OS MÁIS CATIVOS DURANTE O VERÁN
As tarefas asignadas están relacionadas coa organización de eventos destinados ós menores durante as vacacións do verán, e que inclúen dende actividades deportivas ata obradoiros creativos, ademais de certames literarios, concursos de debuxos e camisetas, excursións e actividades de “noites alternativas”.
O pasado 15 de xullo, o director xeral de Xuventude e Voluntariado, Ovidio Rodeiro, achegouse ata Quiroga para coñecer a experiencia destes voluntarios e o día a día do seu desempeño, acompañado polo alcalde de Quiroga, Julio Álvarez, os responsables municipais destas áreas, e os propios voluntarios participantes.
“O PRIMEIRO PROGRAMA EN TODA ESPAÑA QUE APOSTA POLO COMPROMISO SOCIAL DIRECTO DA MOCIDADE”
O programa de Voluntariado Xuvenil da Xunta permite este ano que un total de 69 mozos e mozas de entre 18 e 30 anos se incorporen como voluntarios a proxectos solidarios de 8 concellos e 8 entidades da provincia de Lugo. En total, executarán 2.373 xornadas de acción voluntaria.
Segundo destacou o director xeral, trátase do “primeiro programa en todo o Estado que aposta polo compromiso social directo da mocidade”. Os participantes recibirán ademais unha certificación oficial da experiencia adquirida mediante este proceso de educación non formal, tal e como se establece na nova Lei de Acción Voluntaria, aprobada por unanimidade en 2011.
Os proxectos de voluntariado teñen unha duración de entre 15 e 60 días e céntranse en áreas relacionadas co Camiño de Santiago; coa recuperación da cultura, o arte, ou as tradicións populares galegas; cos colectivos en situación de risco; con proxectos xuvenís; con actividades ambientais ou relacionadas coa igualdade de xénero.
A Xunta destina ó programa de Voluntariado Xuvenil un total de 440.000 euros, un 17% máis que o ano pasado, o que permite que en Galicia se incorporen como voluntarios 736 mozos e mozas a proxectos de 54 concellos e 68 entidades.•
Cargando ...
