Agosto, un mes de deporte na cidade do Cabe

O mes de agosto amosa en Monforte unha gran tradición deportiva, coincidindo coa celebración das Festas Patronais. Logo de diversos torneos celebrados na primeira semana do mes, o día 15 terá lugar o torneo de fútbol das Festas Patronais, que organiza como todos os anos o Club Lemos, no Campo Municipal de A Pinguela. Pola súa banda, o Club Río Cabe organiza para o día 17 o Torneo de Golf Concello de Monforte.
Para promover a prática deportiva, o CB Val de Lemos e o Concello de Monforte organizan entre o 18 e o 22 de agosto o III Campus de Baloncesto Cidade de Monforte, no Pavillón Municipal de A Pinguela.
Outro dos torneos será a quinta edición no Torneo de Volei Praia Concello de Monforte, entre o 19 e o 24 de agosto, no Parque dos Condes. O tenis tamén ten o seu espacio este mes, coa celebración do 15º Torneo de Tenis Cidade de Monforte, que se celebrará nas pistas municipais de A Pinguela do 22 ó 31 de agosto.
O día 23 haberá unha cita doble co fútbol local. Nesta data, disputarase o Trofeo Futbol Base Festas Patronais, organizado polo Calasancio no Campo de Fútbol dos Escolapios, e tamén o partido de fútbol veterán que enfrontará a A.D.Veteráns contra a Ponferradina Veteráns no campo de A Pinguela.
Xa en setembro, o Calasancio organiza o día 20 o Torneo de fútbol 8 de prebenxamín ata alevín, e o Club Billar Templarios será o anfitrión do Open Bola 8, que se cele brará os días 6 e 7 de setembro nas instalacións do clube.•