•Será o sábado 23 de agosto no recinto do campo da feira do Castro •Haberá actividades dende as once da mañá •Esta edición incorpora un Vermú Gaiteiro a partir da unha •Actividades para os máis pequenos pola tarde •Seis grupos de nivel nacional participarán nos concertos da noite

• En Ferreira está todo disposta para a celebración, o vindeiro 23 de agosto, da nova edición do Festival do Castro. Unha completa xornada de actividades lúdicas e musicais para todos os públicos, aberta a toda a veciñanza e visitantes, onde a tradición e a modernidade danse a man nunha cita xa indispensable no calendario festivo do sur de Lugo.

FEIRA DE ARTESANÍA TODO O DÍA, E VERMÚ GAITEIRO PARA PECHAR A XORNADA MATUTINA
A xornada comezará coa apertura dos postos da feira de artesanía, que permanecerán abertos todo o día dende as once da mañá. Xa cerca da unha desenvolverase o Vermú Gaiteiro, novidade deste ano, e que consistirá nunha foliada con gaita ou calquer instrumento, aberta á participación libre, e que terá como premio a invitación á primeira volta dos músicos participantes.

XANTAR POPULAR
O tradicional xantar popular comezará ás dúas, con prezos de 14 euros para adultos e de 12 euros para menores de 12 anos, no caso de adquirir a entrada o propio día do Festival. A venda anticipada terá prezos máis económicos, sendo o tiquet de adulto de 12 euros, e de 8 euros para menores de 12 anos. Poderanse adquirir as entradas anticipadas nos bares Carabelos, Cantina de Goián e Mesón Os Castros, en Pantón; en Los Goya de Monforte, e no bar A Lareira de Escairón. O menú do xantar consistirá en empanada, pementos de Herbón, carne ó caldeiro, lamboadas e refrescos, viños da Ribeira Sacra e café de pote con gotas.
O xantar rematará cun café concerto ás catro e media, amenizado polo Ce Orquestra Pantasma.

ESPECTÁCULOS PARA OS MÁIS CATIVOS POLA TARDE
Xa pola tarde, chegará o turno para os máis cativos.Dende as seis e nas costas do Castro, haberá diversión cos espectáculos de Peter Punk e Manicus, que ofrecerán sesións de clown, malabares, teatro físico, paiaso, danza e pantomima.

MÚSICA TRADICIONAL NO ANOITECER NO CASTRO
Tamén nas costas do Castro terá lugar o Anoitecer no Castro, unha sesión de música tradicional que acadou gran éxito nas pasadas edicións, e que este ano comezará ás dez da noite coa música de Habelas Hainas. Con esta sesión abrirase o forte do programa do Festival do Castro, que se prolongará ata a mañanciña do domingo.

UN PROGRAMA CON GRUPOS DE LUXO NO FESTIVAL DO CASTRO
Dende as once e media da noite, comezará o Festival do Castro, que nesta edición ofrecerá un plantel de luxo. Abrirá a sesión o grupo vasco Korrontzi, que ofrecerá folclore vasco con trikitika ou acordeón diatónico. Pola súa banda, o grupo da comarca de Lemos Os Caralludos encargaranse da música nos cambios e na carpa do Festival.
Un dos pratos fortes desta noite de música en O Castro virá da man de Os Diplomáticos de Monte Alto, cunha actuación sen precedentes no sur de Lugo, onde achegarán a quintaesencia do rock bravú, no que levan traballando dende o 1989.
Ademais, a banda granadina Eskorzo, traerá ó Castro o seu amplo repertorio de músicas, con temas de rock, reggae, funk, música balcánica, drum&bass, afrobeate jazz.
O Castro tamén será unha das paradas da xira de 25 aniversario do grupo Zënzar, que dende Meirama traerá rock clásico con influencias punk, heavy e tradicionais.
A despedida do concerto central do Festival do Castro virá da man do grupo Xenderal, con ragga, rap e beatbox, dentro da súa aposta polo hiphop.
Para chegar con boa música e diversión ata o amencer do domingo, a troula do Festival do Castro continuará co DJ Sapoconcho sen Concho.
Dende a organización informaron que no recinto do Campo da Feira haberá servizo de bar, bocatería e wc durante todo o concerto. Ademais, contan con zona de acampada libre, e haberá servizo de bus para enlazar Monforte co Castro en Pantón.•