PROHIBIDAS ATA O 30 DE SETEMBRO AS QUEIMAS DE RESTOS AGRÍCOLAS E FORESTAIS

A Consellería do Medio Rural e do Mar lembrou que as queimas de restos agrícolas e forestais están prohibidas en Galicia ata o 30 de setembro inclusive. Esta medida de carácter preventivo adoptouse a finais de agosto ante a previsión de altas temperaturas e de vento típicas do período estival. O Decreto 105/2006 que regula medidas relativas á prevención de incendios forestais prohíbe as queimas cando as condicións meteorolóxicas poidan dificultar o seu control, especialmente nos días de vento. Neste sentido, a Consellería de Medio Rural e Mar aconsella limitar o acceso ó monte das persoas e dos vehículos. Asimesmo, lembra que está prohibido fumar, facer lume e queimas no monte, e usar utensilios que xeren lume para cociñar ou iluminar. Tamén lembra que é obrigatorio identificarse ante os axentes, así como pedir autorización para traballar con maquinaria non forestal nin agrícola que poida soltar faíscas.•