• A Área de Cultura da Vicepresidencia da Deputación de Lugo vén de aportar 3.000 euros para o mantemento da tradicional Festa da Pisa da Castaña, que se vén celebrando na aldea de Froxán, en Folgoso do Courel, no mes de decembro. A sinatura deste convenio tivo lugar a finais de agosto, coa presencia do delegado de Cultura e Turismo da Deputación, Mario Outeiro, e o presidente da Asociación Cultural Fonte do Milagro, Evaristo Méndez. Este colectivo vén de recuperar esta tradición dende hai quince anos, polo que dende o organismo provincial avogaron por ““manter viva esta tradición aínda que perdera a súa función orixinaria”. Ademais, Mario Outeiro destacou a trascendencia económica deste tipo de eventos, e apuntou a necesidade de “potenciar a castaña como produto galego con moito futuro”.
A XVI edición da Festa da Pisa da Castaña de Froxán terá lugar o domingo 7 de decembro, cun programa de actos no que destaca unha degustación de produtos de porco, castaña seca e torta de castaña, así como unha exposición conmemorativa titulada “15 anos de Pisa”.
A Festa da Pisa da Castaña trata de rememorar esta labor agrícola, tan antiga como a chegada dos castiñeiros a Galicia, e que mantivo unhas características moi semellantes dende a súa orixe e ata mediados do século XX, cando a introdución da maquinaria no traballo do campo e o despoboamento do Courel a puxo en risco de desaparecer. Este importante patrimonio cultural puido salvarse do olvido grazas ó traballo da Asociación Cultural Fonte do Milagro, que contactou coas xentes do lugar para aprender delas as técnicas tradicionais de secado, pisado e abandoxado da castaña.•
