• A Delegación de Cultura do Concello de Bóveda ten deseñada unha ampla oferta lúdico-cultural para o último trimestre deste ano, con actividades para todos os públicos ó longo dos meses de outubro, novembro e decembro, que se desenvolverán no Centro Sociocultural.
TEATRO EN NOVEMBRO
A programación cultural xa arrincou en Bóveda coa representación teatral «O barco sen mariñeiro», que tivo lugar o domingo 28 de setembro, a cargo da compañía Achádego Teatro. A vindeira sesión teatral está programada para o sábado 8 de novembro, ás 18 horas. Nesta data, a compañía Hipócrita Teatro representará a obra «Emperador, qué pensas? Fala!»
A música terá o seu espazo o domingo 5 de outubro ás 18,30 horas, coa posta en escena do espectáculo «Os sons do vento que pasa», polo grupo Elefante Elegante.
CURSO PARA EMPRENDER NA REDE O DÍA 4
Na programación deste trimestre no concello de Bóveda tamén hai espazo para a formación. Así, o sábado 4 de outubro terá lugar o curso «Emprendendo dende a Rede», en horario de 18,00 a 20,00 horas, dentro do Programa Activa 2014, promovido pola Dirección Xeral de Xuventude.
OUTRAS ACTIVIDADES
En decembro, poderase ver no espazo expositivo do Centro Sociocultural a mostra «As cantigas e a figura do trovador Pedro de Ver».
Ademais, dende a Delegación de Cultura do Concello de Bóveda están a preparar a celebración de diversas efemérides do calendario cultural. Así, o 24 de outubro celebrarase o Día da Biblioteca, mentres que o 31 de outubro organizarase o tradicional Magosto no Samaín. A reivindicación social terá o seu espazo na data do 25 de novembro, cando Bóveda se sume á celebración do Día para a Eliminación da Violencia de Xénero con diversas actividades de concienciación.
