• A mediados deste mes, os socialistas lucenses denunciaron o “grave estado de abandono” no que se atopa o tramo da LU-636 entre a localidade lancaresa de Saa e Becerreá, logo de comprobar in situ a situación deste vial. O secretario provincial do PSdeG-PSOE de Lugo, Juan Carlos González Santín, e o alcalde de Becerreá, Manuel Martínez, acompañados polos voceiros deste partido en Láncara e Sarria, achegáronse a esta estrada para supervisar o estado no que se atopa “debido ó esquecemento continuado ao longo dos anos” por parte da Xunta de Galicia. Os socialistas criticaron que o Goberno galego, logo de rematar en 2005 o último tramo, que vai dende o polígono industrial de Morelle en Sarria ata Saa, aínda non teña iniciados os trámites para acometer a fase que está pendente.
O alcalde de Becerreá, o socialista Manuel Martínez, acusaba á Xunta de “desentendemento descarado” fronte a unha promesa que fixo Alberto Núñez Feijóo na súa etapa como conselleiro de Política Territorial, “quen ao mesmo tempo que colocaba a primeira pedra do treito Morelle-Saa, hai once anos, exponía o proxecto das obras de mellora da terceira fase, deixando clara a vontade da administración autonómica por rematar en tempo e prazo o acondicionamento íntegro do vial”.
PEDIRÁN Á XUNTA QUE RETOME O PROXECTO DE MELLORA DO VIAL
Martínez precisou que esta situación está a crear “cidadáns de primeira, en Sarria, de segunda, en Láncara e Baralla, e despreza ós de Becerreá, xa que nin tan sequera é capaz de parchear a estrada, deixándoa nun estado terceiromundista, cun firme moi perigoso e sen biondas”.
Para reactivar este proxecto, o secretario provincial dos socialistas e deputado autonómico, Juan Carlos González Santín, pedirá no Parlamento de Galicia, e a petición dos compañeiros do partido e dos veciños dos municipios afectados, que a Consellería de Medio Ambiente e Infraestruturas retome o proxecto “no menor tempo posible” e, a continuación, que precise “de forma concreta” os prazos nos que este departamento podería iniciar e rematar as obras.•
Cargando ...
