Iniciativa do Consorcio de Turismo e Turismo de Galicia

• A comezos deste mes presentouse no Parador de Monforte o produto turístico Regala Ribeira Sacra, unha iniciativa do Consorcio de Turismo Ribeira Sacra en colaboración coa Axencia de Turismo de Galicia. Según explicou o presidente do Consorcio de Turismo, Juan Carlos Armesto, e a xerente deste organismo, Alexandra Seara, este produto consiste nun conxunto de experiencias turísticas divididas en seis líneas que definen ó destino Ribeira Sacra.

A RIBEIRA SACRA, UN REGALO PARA DISFRUTAR EN SEIS FORMATOS
Así, Regala o Encoro propón actividades e estancias en contacto directo cos ríos que vertebran a Ribeira Sacra. Regala o Románico ofrece a posibilidade de achegarse ó singular románico desta zona da man de expertos. O produto Regala o Rural inclúe estancias de inmersión na vida rural, participando na elaboración de produtos da zona. Pola súa banda, Regala o Camiño está pensado para os amantes das camiñatas, enriquecidas cun achegamento profundo ós recursos que se atopan nos diferentes itinerarios. Asimesmo, Regala o Tempo ofrece a Ribeira Sacra como destino ideal para relaxarse e desconectar en pleno silencio. E por último, Regala a Viticultura propón o disfrute da nosa particular viticultura con paseos a pé ou no tren turísticos polos viñedos, catas, degustacións en catamarán e outras actividades en torno ó mundo do viño.
Nunha primeira fase, lanzáronse ó mercado un total de 55 experiencias, que se poden adquirir en caixiñas regalo ou en tarxetas. O produto Regala Ribeira Sacra está dirixido tanto a viaxeiros individuais como a parellas, familias con nenos e grupos de todas as idades.•