Máis de 5.000 consultas atendidas na Oficina de Turismo de Quiroga no que vai de ano

• Este mes de outubro, o Concello de Quiroga deu a coñecer os datos de visitantes da Oficina de Turismo, unha vez rematada a tempada estival.

TURISTAS NACIONAIS E INTERNACIONAIS
Entre xaneiro e outubro deste ano, o servizo municipal de información turística atendeu un total de 5.257 consultas presenciais, das que o 88% corresponderon a viaxeiros nacionais e un 12% a turistas internacionais. Dentro deste grupo, a maioría dos visitantes procedían de países europeos, como Francia, Reino Unido e Portugal, seguidos por turistas chegados do outro lado do océano, como Estados Unidos e Arxentina.

AFLUENCIA DE VISITANTES DE FÓRA DE GALICIA
Respecto aos visitantes nacionais, o 31% dos consultantes que pasaron pola Oficina de Turismo de Quiroga foron galegos. Xa fóra da nosa comunidade, o 16% dos turistas procedían de Cataluña, o 15% de Madrid, e o 38% do resto de España, con predominio de visitantes chegados de Castela-León, Valencia e País Vasco.

CONSULTAS SOBRE O ENTORNO DO COUREL E A RIBEIRA SACRA
Según os datos ofrecidos polo Concello de Quiroga, as consultas maioritarias referíronse á contorna de Quiroga e a serra do Courel. O 21% dos visitantes que pasaron pola Oficina de Turismo preguntaron polos atractivos turísticos de Quiroga e a súa oferta de ocio e restauración, e o 20% consultou sobre a Serra do Courel. Asimesmo, a Ribeira Sacra e as súas posibilidades foron o motivo do 10% das consultas realizadas. Ademais, un 9% do total dos visitantes amosou interés polas rutas de sendeirismo, e un 3% requeriu información sobre as singularidades xeolóxicas da contorna quiroguesa, como o sinclinal do Courel ou o túnel de Montefurado.

NOVAS PLATAFORMAS DE INFORMACIÓN
As novas tecnoloxías tamén facilitaron a información turística sobre Quiroga, xa que o correo electrónico da Oficina de Turismo atendeu 262 consultas, a páxina web do Concello de Quiroga rexistrou 67.897 visitas, e outras 121.456 corresponderon ao perfil de Facebook do Concello.
VISITAS ORGANIZADAS EN GRUPOS E DENDE FÓRA DA COMARCA PARA OS MUSEOS DE QUIROGA
Pola súa banda, o Museo Etnográfico de Quiroga acolleu 2.125 visitantes, e o Museo Xeolóxico 1.843 no que vai de ano. O 87% das visitas a estes espazos museísticos procedían de fóra da comarca quiroguesa, e o 97% das visitas foron en grupos de máis de 20 persoas.•