Obras de encauzamento do río Sarria
• O pasado 17 de outubro, o xulgado de Sarria decretou a paralización cautelar das obras que a Confederación Hidrográfica Miño-Sil está a desenvolver na Ponte Ribeira, dentro da execución do proxecto de encauzamento do río Sarria.
Según informaron dende a Plataforma Sarriana polo Río, o auto emitido polo xulgado de Sarria lembra que a Ponte Ribeira, de indubidable valor histórico, artístico, cultural e monumental, forma parte do Ben de Interés Cultural (BIC) Camiño Francés a Santiago, e aparece identificada expresamente como «elemento patrimonial vinculado ó Camiño de Santiago dentro do ámbito do BIC» no decreto 227/2011 de delimitación do Camiño Francés a Santiago.
A Plataforma Sarriana polo Río precisou, en relación a este auto, que o xulgado de Sarria vén de paralizar as obras dado que «estamos ante un presunto delito contra o patrimonio histórico e que a continuación das obras na ponte podería supoñer a destrucción irreversible do valor histórico e cultural desta ponte», según indicou este colectivo.
O AUTO XUDICIAL RECOLLE OS ARGUMENTOS QUE ESTÁ A DEFENDER A PLATAFORMA SARRIANA POLO RÍO
Ademais, a Plataforma Sarriana polo Río lembrou que este auto xudicial acolle os argumentos que este colectivo cidadán leva trasladando «dende hai meses» tanto á Confederación Hidrográfica Miño-Sil, como á Consellería de Cultura e ao Concello de Sarria, «sen atopar ningún eco en ningunha destas institucións, nin sequera na Consellería de Cultura, da que depende a Dirección Xeral do Patrimonio, á que corresponde a protección do patrimonio cultural de Galicia». Dende a Plataforma Sarriana polo Río criticaron que «a día de hoxe, o conselleiro de Cultura segue sen adoptar ningunha medida para dar respostas ás denuncias graves e múltiples infraccións da normativa de protección do patrimonio do Camiño de Santiago formulada en marzo pasado». O colectivo cidadán lamenta asimesmo que, «como sucedera en marzo coa tala do bosque de ameneiros, outra vez tivo que ser a xustiza a que evite in extremis un dano irreversible, nesta ocasión contra o patrimonio histórico-artístico e cultural vencellado ao Camiño de Santiago ao seu paso por Sarria».
«CAOS» NO TRÁFICO LOCAL E «PERXUICIOS» A COMERCIOS E NEGOCIOS POR UNHA «INCOMPRENSIBLE» PLANIFICACIÓN DA OBRA
A Plataforma Sarriana polo Río denunciou ademais que estas obras que o xulgado acaba de paralizar «trouxeron o caos e un sinfín de molestias para os veciños de Sarria». Este colectivo leva meses denunciando a «incomprensible» planificación dunhas obras que, ao cortar simultáneamente tres das pontes que cruzan o río, obligaron a cambiar os horarios escolares e trastornaron seriamente o tráfico da zona, cos subseguintes perxuicios para os comercios e negocios de Sarria». A Plataforma puntualizou que o corte simultáneo de varias pontes xa estaba previsto no cronograma da obra facilitado á Plataforma pola Confederacion Hidrográfica Miño-Sil hai meses.
O PROXECTO DA OBRA ELABOROUSE «DESPREZANDO POR COMPLETO» AOS VECIÑOS E NEGOCIOS DE SARRIA
O colectivo cidadán contrario a este proxecto suliñou que o incumprimento da normativa por parte da Confederación «non fixo máis que complicar a execución dun cronograma que xa fora elaborada desprezando por completo os perxuícios que a obra ía causar aos veciños e negocios de Sarria».•
