•O acto contou coa presencia do conselleiro de Cultura, Educación e Ordenación Universitaria •Carrete Rivera é o presidente do Centro Galego de Barcelona
• O 8 de novembro, o Salón de Plenos do Concello de Quiroga encheuse de público e autoridades durante a ceremonia de entrega da Medalla de Ouro de Quiroga a Manoel Carrete Rivera. A Corporación local quiroguesa acordou a finais de outubro a concesión desta distinción ao xove presidente do Centro Galego de Barcelona polos seus singulares méritos en prol do municipio de Quiroga. Esta decisión recollía o apoio unánime de diversas institucións galegas e catalanas, así como de escritores, catedráticos e particulares, para recoñecer o traballo de Carrete Rivera.
Fillo de quirogueses, o xove avogado Manoel Carrete Rivera desenvolve unha intensa actividade cultural vinculada a Galicia. Autor de cinco libros, recibiu o primeiro premio da FEGALCAT na modalidade de investigación, e está a traballar na súa tese doctoral sobre a diáspora galega en Cataluña a principios do século XX. A nivel institucional, Manoel Carrete Rivera preside o Centro Galego de Barcelona, a segunda entidade máis antiga da diáspora galega, e o Centro Galego-Casas de Galicia de Barcelona e provincia, ademais de secretario da Federación de Entidades Galegas de Cataluña (FEGALCAT).
O acto contou coa presencia do conselleiro de Cultura, Educación e Ordenación Universitaria, Jesús Vázquez Abad, cualificou a Manoel Carrete Rivera de “admirable pola súa bonhomía e curiosidade intelectual no que a galeguidade prendeu un bo día para que agromasen nel froitos prodixiosos dos que foi e é beneficiaria a comunidade galega en Cataluña”. Ademais, o titular de Cultura gabou o esforzo de Carrete Rivera “por seguir traballando de cara o futuro con empeño e sabedoría no labor de enriquecer e prestixiar en Cataluña a cultura e a lingua do noso”.
O secretario xeral de Política Lingüística, Valentín García, asistiu á celebración en Quiroga, ademais de persoeiros do mundo da cultura como o director da Real Banda de Gaitas da Deputación de Ourense, o presentador José Manuel Piñeiro, e a cantante de fados María do Ceo, que emocionou ata as bágoas ao homenaxeado e aos público asistente cunha sentida interpretación.•
