CIG-Saúde denuncia a “descapitalización” do Hospital de Monforte

• O sindicato CIG-Saúde denunciou a “descapitalización” do Hospital de Monforte, logo da aprobación do decreto de xestión integrada de Lugo, Cervo e Monforte. “A tan cacarexada xestión integrada, que ía ser tan beneficiosa para o Hospital, non o está a ser tanto”, critican. A formación sindical denuncia, entre outros aspectos relativos á xestión, que “aínda estamos esperando o nomeamento do Director Médico” que establecía o decreto, e critican que non se teña nomeado substituto do dimitido subdirector de Xestión, “xa que agora se está levando todo desde Lugo”. Por outra banda, dende CIG-Saúde denuncian que “está a vir só un día á semana un enxeñeiro dende Lugo para atender as funcións do cesado xefe de Mantemento, cando se están a dar “moitísimos problemas” con equipos como o mamógrafo, “que é de 2002, e que xa o trouxeran doutro hospital”.•