A piques de rematar o ano

Pola súa banda, os nacionalistas criticaron que a partida para a supresión dos pasos a nivel da nosa provincia “pasa de 6,2 millóns a cero” nos Presupostos do Estado para 2015

• Os socialistas de Lugo denunciaron que o Ministerio de Fomento só ten executados 4,1 dos máis de 6,2 millóns de euros consignados no exercicio de 2014 para a supresiónd dos pasos a nivel na provincia de Lugo. Así se desprende da resposta oficial do Ministerio de Fomento á pregunta formulada recentemente pola deputada socialista no Congreso Margarita Pérez Herraiz sobre o grado de execución do orzamento destinado polo Goberno á supresión dos pasos a nivel na provincia de Lugo.

EN CONSERVACIÓN E MANTEMENTO AÍNDA NON SE EXECUTOU O 66%
A deputada socialista deu a coñecer estes datos en A Pobra de San Xiao, acompañada polo senador socialista Ricardo Varela, o coordinador comarcal do PSdeG-PSOE, Pablo Rivera, e o secretario provincial desta formación, Juan Carlos González Santín. Os socialistas denunciaron que estea sen executar preto do 40% do orzamento para seguridade vial en Lugo “a piques de rematar o ano”. “Ante tales datos, estamos diante do Ministerio de Fomento máis ineficaz e peor xestor de toda a etapa democrática”, criticou González Santín. O secretario provincial do PSdeG-PSOE lamentou que “non só borraron a Lugo do mapa da Alta Velocidade, ao suspender o contrato da Intermodal, senón que en conservación e mantemento non executan o 60%”.
Os socialistas elixiron o paso a nivel da localidade lancaresa de A Pobra de San Xillao para informar do “escaso grado de compromiso do Goberno nesta materia”, porque, ademais, de ser un dos máis perigosos da provincia, “é unha das vías que o Goberno pretendía suprimir na provincia para garantir así a seguridade dos cidadáns, ao tempo que se contribuiría a reducir o risco de accidentes”. Según explicou a deputada no Congreso Margarita Pérez Herraiz, “o Partido Socialista encamiñara o proxecto para a supresión de 16 pasos a nivel na provincia, en concreto os situados en Monforte, Sober, Pantón, Quiroga, Ribas de Sil, A Pobra do Brollón, Bóveda, Sarria, Láncara, O Páramo, O Corgo, Lugo, Rábade, Begonte e Guitiriz. “A supresión lamentablemente quedou bloqueada cando o Ministerio decidiu paralizar as obras da variante de A Pobra de San Xillao, e que permitiría a eliminación destas vías”, criticou Pérez Herraiz.

O BNG VÉN DENUNCIANDO QUE “GALICIA, CON ESCASAS INFRAESTRUTURAS E POUCOS SERVIZOS, SOPORTA UNHA ALTA SINISTRALIDADE”
A situación da seguridade ferroviaria en Lugo vén sendo denunciada polo Bloque Nacionalista Galego ao longo deste ano. No primeiro aniversario do accidente de Angrois, o vicepresidente primeiro da Deputación de Lugo, o nacionalista Antonio Veiga, denunciaba a “política discriminatoria” do Goberno central ao paralizar a construción da variante de A Pobra de San Xiao. Veiga criticaba tamén que “a pesar de contar Galiza con escasas infraestruturas e poucos servizos ferroviarios, ten que soportar, ademais, un alto índice de accidentes neste medio de transporte”, sobre todo nos pasos a nivel. O mandatario provincial lembrou que Fomento anunciara en 2010 a construción dunha variante exterior que permitiría suprimir os seis pasos a nivel de Monforte, “e catro anos despois a veciñanza segue agardando por esta solución”.
Antonio Veiga criticou que a partida dos Presupostos do Estado para 2015 nesta materia “pase de 6,2 millóns a cero”.•