Máis de un millón de euros para obras e servizos na nosa provincia

Catro concellos do sur de Lugo están incluídos nestas actuacións provinciais

•Bóveda disporá de preto de 400.000 euros da Deputación para a mellora do abastecemento de auga •En San Clodio construirase un parque ambiental, e incrementaranse as instalacións lúdicas na contorna da praia de San Clodio

Un momento da visita do presidente da Deputación, José Ramón Gómez Besteiro, a Bóveda, acompañado polo alcalde, José Manuel Arias, o pasado 3 de decembro. GPDL.
Un momento da visita do presidente da Deputación, José Ramón Gómez Besteiro, a Bóveda, acompañado polo alcalde, José Manuel Arias, o pasado 3 de decembro. GPDL.

• A Deputación de Lugo aprobou este mes un investimento de 1.314.205 euros en obras e servizos nos concellos da Fonsagrada, Bóveda, O Incio, A Pobra do Brollón e Ribas de Sil.

DOTACIÓNS NO RURAL PARA «CORRIXIR DESIGUALDADES E MELLORAR A CALIDADE DE VIDA»
Según explicaron os responsables provinciais, esta achega de máis dun millón de euros «beneficiará aos veciños que contarán con novas infraestruturas e instalacións deportivas, así como diversas melloras en dotación públicas». O voceiro socialista da Deputación, Manuel Martínez, destacou este «esforzo inversor» do organismo provincial, que permite “dotar ao rural de infraestruturas e servizos, imprescindibles para corrixir as desigualdades e mellorar a calidade de vida dos lucenses, con independencia do lugar onde residan, así como fixar poboación”.

PRETO DE 400.000 EUROS PARA OBRAS E SERVIZOS EN BÓVEDA
A partida que a Deputación lucense acaba de aprobar este mes para obras e servizos no rural inclúe un investimento de preto de 400.000 euros en Bóveda. O pasado día 5, o presidente do organismo provincial, José Ramón Gómez Besteiro, acompañado polo alcalde de Bóveda, José Manuel Arias, adiantou na súa visita a este municipio que a Deputación vai dotar a este concello dunha nova estación de tratamento de auga potable, así como a reposición de tubaxes na parroquia de Guntín. Besteiro sinalou que estas obras, «que son de xustiza, van mellorar o abastecemento de augas do 80 % da poboación do concello”.
O organismo provincial construirá en Bóveda un novo depósito de auga de 400 metros cúbicos. Esta obra inclúe un decantador físico-químico á entrada da depuradora para eliminar da auga substancias tóxicas e residuos sólidos, evitar a abrasión das bombas ou desgaste dos materiais, epotabilizar a auga. Ademais, estes traballos incluirán a impermeabilización de dous depósitos de augas, e tamén se dotará á parroquia de Guntín dunha nova traída de augas. Según precisaron os responsables provinciais, o conxunto destas actuacións suma un orzamento de 386.155 euros.
Durante a visita do mandatario provincial a Bóveda, o alcalde, José Manuel Arias, agradeceu á Deputación a súa colaboración nesta obra “tan necesaria, dificilmente asumible para un concello como o de Bóveda”.
O titular provincial supervisou tamén o remate doutras obras en Bóveda, nas que se investiron máis de 20.000 euros. A institución provincial rehabilitou a Capela da Raíña, unha das actuacións máis demandadas polos veciños debido á tradición histórica do templo, así como a Capela de San Martín, na que se restauraron teitos e muros. Ademais, ampliouse unha estrada de titularidade provincial en San Martín, e procedeuse ao arranxo do firme deste vial con emulsión de triple rego.

MÁIS DE 95.000 EUROS EN ESPAZOS MEDIOAMBIENTAIS E DE LECER EN SAN CLODIO
A partida provincial para obras e servizos no rural lucense inclúe tamén dúas actuacións en Ribas de Sil. A Deputación vai destinar 95.400 euros á construción dun novo parque medioambiental no casco urbano de San Clodio, que virá substituír ao parque infantil existente, e á instalacion de dous rocódromos e paneis medioambientais na área recreativa da praia fluvial de San Clodio. Según explicou Roberto Castro, concelleiro de Ribas de Sil, o parque infantil ubicado no centro da capitalidade municipal está a acusar o paso do tempo. «Este é un parque moi especial para nós, xa que foi a primeira actuación que realizamos como equipo de Goberno aló polo 1998 con fondos europeos, e ao longo dos anos fomos renovando e modernizando as súas instalacións», explica Castro, quen suliña que «agora pensamos que é tempo de actuar de novo para que estea en condicións». O proxecto que financia a Deputación con fondos europeos inclúe a renovación total deste espazo, así como a peatonalización de dúas rúas adxacentes «para garantir ao máximo a seguridade da zona de xogos infantís, que tamén terá un peche perimetral». Esta nova área lúdica estará dotada de paneis con información medioambiental da zona.
Logo que se desmantele o antigo parque do centro de San Clodio, e para optimizar os recursos, o Concello vai reutilizar todos os elementos de xogo que sexan aproveitables para crear un novo espazo de lecer na praia fluvial. Asimesmo, o pavimento do parque vello destinarase a mellorar o pequeno parque anexo ao colexio público. «Deste xeito, San Clodio disporá dun parque de uso escolar, outro para xogar todo o ano, e un terceiro para disfrute de veciños e visitantes na zona da praia», explica Castro.•

Deixa unha resposta

Your email address will not be published.

Nova Anterior

Os Orzamentos de Sober priorizarán o gasto social e os investimentos

Seguinte Nova

MONFORTE ACOLLERÁ O I CAMPIONATO DE XADREZ POR IDADES O 25 DE XANEIRO

Últimas noticias sobre INFRAESTRUTURAS

A %d blogueros les gusta esto: