Reivindican o mantemento dos servizos sanitarios no rural

•O rexedor nacionalista criticou que no Centro de Saúde de A Pobra do Brollón hai esperas de oito días para unha consulta ordinaria •Xosé Lois Maceda rexistrou un escrito ante o Valedor do Pobo polo recorte no número de médicos que está a aplicar a Consellería neste municipio

A situación dos servizos sanitarios no rural lucense segue a estar de actualidade, con especial protagonismo nos pequenos concellos. En A Pobra do Brollón seguen a esixir á Consellería de Sanidade a reposición dun dos dous médicos que prestan servizo no Centro de Saúde da capitalidade municipal. Según denunciou o alcalde nacionalista Xosé Lois Maceda, esta poboación de 1.800 persoas está a ser atendida dende o mes de agosto por un único médico titular e outro que acude só os martes, dado que Sanidade non cubriu a baixa médica do outro facultativo. Esta situación provocou a reacción cidadá nunha concentración diante do Centro de Saúde a finais de novembro, para esixir o mantemento da atención sanitaria neste municipio, que ademais conta cunha alta taxa de envellecemento. Asimesmo, o alcalde presentou no mes de decembro un escrito na oficina do Valedor de Pobo para darlle a coñecer esta situación, e solicitar a súa mediación ante a Consellería.

Esta situación agravouse a mediados de xaneiro, cando a médico que viña a consultar un día á semana tomou vacacións, e o Sergas non enviou a ningún facultativo a sustituíla. O alcalde de Brollón denunciou que «o Sergas deixou aos preto de 2.000 veciños de Brollón cun só médico nos días con maior pico de gripe na sanidade galega».

MACEDA: «EN BROLLÓN HAI UN MÉDICO E TRES VETERINARIOS, POLO QUE ESTÁN MELLOR ATENDIDOS OS ANIMAIS QUE AS PERSOAS»

Posteriormente, o rexedor nacionalista compareceu en rolda de prensa na sede do BNG de Compostela, onde denunciou que «actualmente en Brollón hai un médico e tres veterinarios, o que evidencia que están mellor atendidos os animais que as persoas». Maceda explicou que o problema de atención sanitaria en Brollón foi comunicada á Consellería de Sanidade, que confirmou o cumprimento da ratio de tarxetas «pero sen compromiso algún para cubrir a baixa do médico».

DENDE O BNG PIDEN Á XUNTA «RESPECTO PARA O RURAL GALEGO E PARA AS PERSOAS QUE VIVEN NEL»

Para o alcalde de Brollón resulta «urxente» contar con dous médicos, polo que reiterou a «necesidade de cubrir a baixa do facultativo porque en moitas ocasións durante unha urxencia o centro de saúde permanece unha hora ou hora e media sen atención». Ademais, Maceda engadiu que os veciños teñen que esperar oito días para unha cita médica ordinaria.

O rexedor tamén preguntou «onde está a política de reequilibrio territorial que defende a Xunta de Galicia, cando en realidade practica unha política para cerrar o rural». «Nós, non imos a marchar, e chegaremos a onde faga falta para manter os servizos», suliñou Maceda.

Ademais, o deputado nacionalista por Lugo, Cosme Pombo, que acompañou aos membros do Goberno local de Brollón na rolda de prensa, pediu á Xunta «respecto para o rural galego e para as persoas que viven nel». «Dende o BNG entendemos que un concello como Brollón, rural, con poboación envellecida e cun hospital en Lemos que cae a cachos, non pode recortar tamén a Atención Primaria, precisou.•

O Goberno provincial pide a dimisión da conselleira de Sanidade «por privar aos lucenses de servizos sanitarios»

Esixen a posta en marcha dos servizos de Radioterapia, Hemodinámica as 24 horas e Medicina Nuclear no HULA

O Pleno da Deputación do 30 de decembro aprobou a moción impulsada por Gómez Besteiro en defensa de Radioterapia, Hemodinámica as 24 horas e Medicina Nuclear no HULA. A aprobación foi posible polos votos a favor de PSOE e BNG, e o PP votou en contra. Máis de 100 veciños da provincia asistiron á sesión para amosar o apoio aos acordos da moción. Según o texto aprobado, o Goberno provincial esixe a «inmediata dimisión de Rocío Mosquera pola súa nefasta xestión á fronte da Consellería de Sanidade da Xunta de Galicia, que institucionalizou a discriminación cara os lucenses, privándoos das mínimas garantías de acceso aos servizos sanitarios». Ademais, manifesta o seu rexeitamento «ás prácticas políticas do PP na Xunta, que deformaron o concepto de soberanía popular mediante a Iniciativa Lexislativa, recollido no artigo 87 da Constitución».