O 16 de xaneiro foi inaugurada no espazo expositivo da Capela de Santa María, en Lugo, a mostra titulada «Mans de ferro», centrada na figura dos ferreiros e nas súas xeracións. A exposición reúne 150 pezas elaboradas por 31 artesáns, o maior de 93 anos e o máis mozo de 32, así como de dous afiadores. Coa mostra «Mans de ferro», a Deputación rende homenaxe a un «oficio en certo declive, pero que aínda segue vivo». Entre as pezas atópanse fouciños de hai preto de 60 anos, un dos instrumentos de labranza que os ferreiros lugueses vendían aos agricultores de Castela para segar o trigo, así como coitelos ou navallas. Ás pezas expostas acompáñaas unha fotografía do ferreiro creador, todas elas realizadas por José Salgado. (Foto cedida).
