Pedirán á Xunta «medidas urxentes» para evitar o «derrubamento definitivo» do Pazo de Diomondi

•Os socialistas critican a «desidia visible e notoria» do Goberno galego dende 2010, cando se derrubou a cuberta, «e dende entón nada se ten feito para reconstruíla»

• Os socialistas lucenses anunciaron que levarán ao vindeiro pleno do Parlamento galego as queixas veciñais polo estado no que se atopa o Pazo de Diomondi, no municipio de O Saviñao. O 20 de xaneiro, os deputados Vicente Docasar e Juan Carlos González Santín, acompañados por José Antonio Quiroga e membros da agrupación local do PSdeG-PSOE neste concello, achegáronse ata Diomondi para comprobar o «deficitario» estado no que se atopa este ben cultural. Os socialistas criticaron que, dende que en 2010 se derrubou a cuberta do edificio, «nada se ten feito para reconstruíla».

PIDEN Á CONSELLERÍA DE CULTURA QUE ORDENE AO BISPADO QUE CUMPRA A LEI DO PATRIMONIO CULTURAL

Vicente Docasar cualificou de «visible e notoria a desidia do Goberno galego» diante desta situación, sobre a que están a recibir na agrupación local socialista numerosas queixas por parte dos veciños. O deputado socialista anunciou que o seu grupo parlamentario vai levar este tema ao vindeiro pleno da Cámara galega. «Pedirémoslle a Cultura que ordene ao propietario que cumpra axiña cos deberes legalmente establecidos, impulsando sen demora o proxecto de rehabilitación de tan significativo monumento do patrimonio cultural galego», precisou o deputado. Docasar lembrou o texto no que a vixente Lei 8/1995, de 30 de outubro, do Patrimonio Cultural de Galicia, no seu artigo 25 establece que «os propietarios, posuidores e demais titulares de dereito reais sobre bens integrantes do patrimonio cultural de Galicia están obrigados a conservalos, coidalos e protexelos debidamente para asegurar a súa integridade e evitar a súa perda, destrución ou deterioro».

Os deputados socialistas suliñaron que «a pesar de todas as iniciativas, nada se ten feito». Docasar e González Santín criticaron o estado da cuestión, na que «a diócese di non ter cartos para acometer a rehabilitación, e descoñécese se a Xunta fixo algunha xestión para colaborar con fondos propios ou con fondo estatais ou mesmo privados para levar a cabo unha das obras de conservación que son imprescindibles para que ese monumento non desapareza por desleixo do noso patrimonio cultural». Docasar insistiu en que «a Xunta debe cumprir o compromiso asumido recentemente nunha visita a este mesmo lugar».•