•Dende o BNG afirmaron «non conformarse con esta esmola electoral», e seguirán «reclamando xunto á veciñanza dous médicos a tempo completo»
• O Servizo Galego de Saúde incrementará a partir de febreiro a atención médica no centro de saúde de Pobra do Brollón. Esta foi a resposta do xerente da Estructura Organizativa da Xestión integrada do Sergas na provincia de Lugo, Antonio García, ao voceiro do PP nunha xuntanza mantida a instancias do edil popular en Brollón, Fernando Parada. O xerente da Estructura Organizativa da Xestión Integrada confirmoulle a Parada que o Sergas xa realizou as xestións oportunas para, a partir de febreiro, incrementar o número de días semanais de asistencia dun segundo facultativo. Parada solicitara unha xuntanza co xerente para interesarse da supervisión, por parte do SERGAS, das necesidades asistenciais despois de xurdir a baixa dun médico do centro de saúde do municipio, que conlevou a reorganización das tarefas asistenciais.
MACEDA: «É UNHA BURLA CONTENTAR ASÍ AOS VECIÑOS»
Logo de coñecerse este anuncio, o alcalde da Pobra do Brollón, o nacionalista Xosé Lois Maceda, declarou que «non nos conformamos coa esmola electoral» anunciada polo portavoz do PP, e seguirá «reclamando, xunto aos veciños e veciñas do concello, que se restitúa a atención médica no Centro de Saúde con dous facultativos a tempo completo».
O alcalde di que «o que os veciños da Pobra levan meses reclamando son 2 médicos a tempo completo no Centro de Saúde, e non nos imos conformar con menos, porque coa saúde da xente non se xoga». «Parécenos unha burla que se queira contentar aos veciños con 7 horas máis de atención médica á semana», lamentou Maceda.
O nacionalista acusa ao portavoz do PP de «poñerse do lado do Sergas e da Xunta en vez do lado dos veciños da Pobra que esixen algo xusto». Ademais, considerou «chamativo» que sexa o portavoz local do PP e non o Sergas o que faga o anuncio. «Seguramente queira promocionarse deste xeito para as eleccións, pero poñéndose do lado do Sergas defendendo a supresión do médico penso que o que vai lograr é todo o contrario», afirmou Maceda.•
Cargando ...
