Todo listo para festexar o Entroido no sur de Lugo

Febreiro, mes de Entroido, arrincou no sur de Lugo coa celebración, o día primeiro, do Domingo Lambedoiro, na parroquia chantadina de Santiago de Arriba.  O Entroido Ribeirao é o máis longo dos que se celebran na nosa provincia, xa que aproveita os tres domingos anteriores ao Martes de Entroido para dar saída aos volantes, o peliqueiro e o meco. Logo do Domingo Corredoiro, as vindeiras citas serán o Domingo e o Martes de Entroido, cun desfile destes tradicionais figurantes dende as catro. O propio Martes haberá xogos populares con premios para os gañadores, como preludo ao Choro do Pucho, seguido dunha merenda con torriscos, chourizos e castañas. O Mequiño agasallará aos cativos presentes con lambetadas.

MARTES DE ENTROIDO EN CHANTADA

O Martes de Entroido a festa trasládase á capitalidade chantadina, co tradicional desfile de disfraces e comparsas polo centro urbano. O itinerario partirá de diante da residencia Geriatros, para continuar pola Praza de Santa Ana, Avenida de Ourense, Praza Catro Camiños, Doutor Mariano Cedrón, e rematará na Praza de Santa Ana, e en caso de choiva na Praza de Galicia. Logo da entrega de premios, a celebración do Entroido culminará coa actuación do grupo D’Moda, e a charanga Garrafon.com

DOMINGO E LUNS, OS DÍAS GRANDES EN SARRIA E LOUSEIRO

O Domingo de Entroido celebrarase en Sarria o Gran Desfile polas rúas da vila, con premios ás mellores comparsas e carrozas. A xornada rematará na sala discoteca Litmar coa actuación da orquestra Filadelfia.

Os máis novos disfrutarán o luns 16 coa celebración do Entroido Infantil a partir das catro, na sede de La Unión, con animación e música. Xa pola noite, os adultos poderán despedir o Entroido cunha Gran Festa na sala discoteca Litmar, a partir das 23,00 horas. A festa contará con actuacións de dj’s, e sorteos, ademais de premios a disfraces individuais, parellas e grupos de tres ou máis membros. A Gran Festa Entroido está organizada polos locales adheridos a «Sarria Mola».

Para participar do Entroido de Louseiro, que tamén se celebra o luns 16, haberá autobuses dende o cruce da Ciguñeira a partir das 23,30 horas. Na festa actuarán os grupos Punto e Aparte, e Dúo Eclipse.

DESFILE DE COMPARSAS EN MONFORTE

O Martes de Entroido será o día do Desfile de Comparsas en Monforte. A comitiva sairá da Praza da Estación ás cinco, pasando por Calvo Sotelo e Roberto Baamonde, ata a Praza da Compañía, onde se procederá á entrega de premios.

DESFILE E GRAN BAILE CHOCOLATADA EN RIBAS DO SIL

O sábado 14 celebrarase en San Clodio o desfile de comparsas, que sairá ás 17,30 horas do Polideportivo Municipal. Ao remate do desfile, terá lugar a tradicional Chocolatada e o Gran Baile de Disfraces na Praza do Concello, onde se entregarán os premios ás mellores comparsas.

ENTROIDO EN SOBER

Logo do desfile organizado polo CEIP Virxe do Carme o venres 13, o sábado 14 o pavillón do centro escolar acollerá o desfile dunha gran comparsa formada por integrantes da Banda de Música de Sober, alumnado da Escola de Música, do PAI e do CEIP. A partir das seis da tarde haberá unha merenda para todos os participantes e animación a cargo da compañía «Ni fu ni Fa Animación», ademais de música, xogos e concurso de disfraces para os máis cativos. Ás sete comezará o IX Baile da Cachucha, con degustación gratuíta de cachucha e viño, e entrega dos premios do I Certame de Coplas de Compadres e Comadres, novidade deste ano. A xornada rematará co concurso de disfraces para adultos, a partir das nove.

ENTROIDO EN QUIROGA

O domingo 15 será o día grande do Entroido en Quiroga, co Desfile-Concurso de Comparsas, a partir das 17 horas. A comitiva arrincará na rúa Real, na confluencia coa rúa Piscinas, ata rematar diante do Concello, onde se celebrará unha festa amenizada polo Dúo Tropical, e terá lugar a entrega de premios do concurso.

O luns haberá unha festa infantil de disfraces a partir das cinco no disco pub Yoya. Ese día, a Oficina de Xuventude organiza unha excursión para asistir á saída do Oso de Salcedo, dende diante da Casa da Cultura de Quiroga ás 16,00 horas. O día 17, o Centro Social celebra o Martes de Entroido cunha xornada gastronómica de animación e convivencia social, gratuíta para os socios. Ademais, haberá un baile de disfraces ao que poden asistir todas as persoas que o desexen.

ACTIVIDADES EN BROLLÓN E SALCEDO

O sábado 14 acollerá os actos do Entroido en A Pobra do Brollón. A partir das cinco da tarde, terá lugar o desfile de disfraces, comparsas e carrozas, que partirá do cruce da estrada de Sáa, e percorrerá a capitalidade municipal. O desfile estará acompañado pola charanga Unión Monfortina. A entrega de premios celebrarase ao remate do desfile da Casa da Cultura Olga Novo.

En Salcedo, as celebracións comezarán o sábado ás 22,00 horas, con teatro e baile no local da Asociación Veciñal. O domingo sairá ás catro e media o Morrión coas Madamas e Danzantes, e o pregón, a cargo do humorista Rafa Durán, será ás cinco. O baile será ás oito, e ás dez voltará o teatro e unha festa coa orquestra París de Noia. O luns iniciarase  coas coplas de cego ás catro e media, e ás cinco terá lugar a esperada saída do Oso e dos Criados.  A xornada rematará cunha cea popular ás dez da noite, amenizada por dúas orquestras. O Martes de Entroido acollerá unha sesión de disfraces de campo ás cinco, e ás nove haberá unha paellada de balde e baile con orquestra. As festas completaranse co concurso de disfraces e a entrega de premios.

 

 

 

Deixa unha resposta

Your email address will not be published.

Nova Anterior

Anuncian unha segunda edición do programa Ben Empregado! para febreiro

Seguinte Nova

Completan o equipamento interior do Auditorio de Chantada

Últimas noticias sobre ASOCIACIONISMO

 
A %d blogueros les gusta esto: