•Forzas políticas, sindicais e veciñais criticaron a actitude da Consellería de Sanidade ante esta situación •O xefe de Cardioloxía do HULA declarou, nunha charla-coloquio no Pazo de San Marcos de Lugo, que unha Sala de Hemodinámica 24 horas no HULA tería «un impacto indubidable» na redución do índice de mortandade dos infartados
• A dotación de máis servizos para o Hospital Universitario Lucus Augusti (HULA) continúa a ser unha das principais demandas no eido da saúde pública na nosa provincia. Logo de que o Goberno galego anunciase o mes pasado a inxección dunha partida económica extraordinaria para a adquisición de tecnoloxía médica nos hospitais galegos, e que suporá a implantación este ano do equipamento para Radioterapia e Medicina Nuclear no HULA, a terceira das demandas que se viñan facendo dende diversos sectores, e que piden un servizo de Hemodinámica as 24 horas, segue sen resolverse.
SANIDADE ESTÁ A CREAR «CIDADÁNS DE PRIMEIRA E DE SEGUNDA«
A comezos de febreiro, tivo lugar unha concentración diante do HULA para criticar a actitude da Consellería de Sanidade ante esta situación. Representantes provinciais socialistas, entre os que se atopaban o deputado Juan Carlos González Santín, a vicepresidenta segunda da Deputación, Lara Méndez, ou o alcalde de Lugo, José López Orozco, manifestaron o seu rexeitamento á visita que o día anterior realizara a conselleira de Sanidade, Rocío Mosquera, a Lugo. Acompañados polo presidente da Federación de Veciños de Lugo, Jesús Vázquez, e distintos representantes sindicais, os socialistas criticaron «decididamente» que Mosquera acudira a Lugo «para ratificar que os lucenses non precisan Hemodinámica as 24 horas». Según precisou González Santín, «trátase dunha afirmación escandalosa, xa que o que ten que facer a conselleira é defender por riba de todo a saúde das persoas». O deputado socialista afirmou que «o que veu a facer a conselleira a Lugo foi unha provocación», xa que, según precisou Santín, «sabemos que máis da metade das persoas que chegan ao HULA tardan alomenos 120 minutos, o tempo máximo para que non haxa secuelas». Por este motivo, considera que tanto a titular do SERGAS como o presidente da Xunta, «que é o último responsable de todo isto», o que están a facer é «crear cidadáns de primeira e de segunda».
O 60% DOS INFARTADOS LUCENSES TEÑEN QUE SER ATENDIDOS NA CORUÑA
A necesidade de incorporar este servizo ao HULA foi un dos temas tratados na charla-coloquio «O corazón dos lucenses», que a Deputación de Lugo organizou o 29 de xaneiro, e que despertou un gran interés cidadán, como demostrou o cheo absoluto do Salón de Actos do Pazo de San Marcos. Durante esta charla, o xefe do servizo de Cardioloxía do HULA, Carlos González Juanatey, explicou que as doenzas de corazón son a causa do 34% das mortes que se producen cada ano na provincia de Lugo. Esta estatística podería reducirse significativamente, según precisou este especialista, se o paciente fora atendido en menos de 120 minutos, algo que só ocorre en 1 de cada 3 casos de infartados lucenses. O prestixioso cardiólogo González Juanatey destacou que unha sala de Hemodinámica 24 horas no HULA tería «un impacto» indubidable na redución do índice de mortandade dos infartados, o 60% dos cales aínda teñen que ser atendidos en A Coruña. Ademais, o custo deste funcionamento continuo sería «perfectamente asumible» por parte da Administración autonómica, xa que só suporía un hemodinamista máis, según Juanatey. Contar cun servizo as 24 horas marcaría a diferencia entre unha boa atención e unha atención «óptima», precisou o especialista.•
Cargando ...
