•O Concello solicitou á Xunta un obradoiro de emprego, denominado “Rutas verdes no casco histórico de Monforte” •28 alumnos contarán con formación remunerada neste obradoiro

Recreación dunha das actuacións previstas no obradoiro, coa que se crearían sendeiros nas zonas verdes do Parque dos Condes. (Infografía: Concello de Monforte).

• O Concello de Monforte formalizou este mes a solicitude á Xunta de Galicia do obradoiro de emprego denominado “Rutas verdes no casco histórico de Monforte”. Esta iniciativa, que se levaría a cabo de xuño a novembro deste ano, ofrecería formación e práticas remuneradas a un total de 28 alumnos, e a contratación de tres profesores a xornada completa, outro a media xornada, un director e un administrativo. O obradoiro inclúe as especialidades de instalación e mantemento de xardíns e zonas verdes; pavimentos e albanelería de urbanización; e instalación de elementos de carpintería.

PARQUE DA COMPAÑÍA, DE ZAPARDIEL, E ZONA FLUVIAL DO PARQUE DOS CONDES
O obxectivo deste obradoiro é a recuperación e posta en valor de espazos públicos no casco histórico, e a dinamización dos espazos medioambientais. Ademais do acondicionamento das zonas, estas quedarían unidas mediante unha ruta verde medioambiental, á que se daría forma con estes traballos.
As áreas incluídas no proxecto son o parque da Compañía, a zona fluvial do Parque dos Condes, e o parque Zapardiel. En canto á Compañía, preténdese reestruturar o seu parque, acondicionando a zona verde con sendeiros para o seu mellor disfrute pola cidadanía, e dotándoo dunha imaxe máis innovadora. A posta en valor dos restos arqueolóxicos atopados no parque Zapardiel é outro obxectivo do proxecto, para o seu aproveitamento turístico, medioambiental e patrimonial. A creación dunha ruta verde polo casco histórico de Monforte implicaría a instalación de paneis sobre a flora e fauna nas zonas fluviais do centro de Monforte, para exaltar o valor dos ríos como eixos das cidades.

CRÍTICA AO REDESEÑO DO XARDÍN DA COMPAÑÍA
A raíz desta xestión municipal, o voceiro socialista, José Tomé, declarou o seu apoio a este obradoiro “polo que supón de creación de emprego”, aínda que criticou de “erro” incluír a reforma do xardín da Compañía, xa que hai poucos anos que se realizou un “investimento importante” na súa mellora, que incluía a modificación dos viais interiores e a supresión dun paseo diagonal que tiña o pavimento de pedra.•