A Pobra do Brollón recuperou a memoria histórica da resistencia antifranquista cunha exposición

Esta iniciativa forma parte dun ciclo de conferencias e táboas redondas promovidas pola Área de Cultura da Deputación, que dende hai uns meses leva analizando o proceso de represión e resistencia durante a ditadura franquista A mostra «40 anos de represión e resistencia» complementouse coa proxección de dous audiovisuais en Brollón

El pase de diapositivas requiere JavaScript.

• A Casa da Cultura Olga Novo de A Pobra acolleu ata o 13 de marzo a exposición «40 anos de represión e resistencia», organizada pola Área de Cultura da Vicepresidencia primeira da Deputación de Lugo, en colaboración co Concello de A Pobra do Brollón. Esta mostra está incluída dentro dunha iniciativa deste departamento provincial para afondar nos diversos aspectos da resistencia antifranquista en Galicia. A mostra de Brollón, comisariada por Antón Somoza e Antón Grande, complementouse coa proxección do documental «A volta dos nove», o día 6, e o venres 13 a partir das 20,30 horas proxectouse na Casa da Cultura o documental «O Piloto», con guión do chantadino Afonso Eiré.

RECONSTRUCIÓN DAS CONDICIÓNS DE VIDA DOS RESISTENTES ANTIFRANQUISTAS

Según explicou o delegado de Cultura da Deputación, Mario Outeiro, durante a inauguración da mostra o día 3, a exposición tivo como obxectivo amosar como se desenvolveu a resistencia á ditadura franquista, e tamén «o papel de moitos loitadores, descoñecidos en gran parte, cuxa vida se percorre a través dos materiais recollidos na exposición». Na mostra puideron verse dende fichas policiais ata recortes de prensa, correspondencia e os utensilios para facer chegar as comunicacións dos resistentes ás súas familias e entre eles. «Tentouse facer unha caracterización o máis completa posible das condicións nas que sobreviviron estas persoas á persecución emprendida contra elas», afirmou Outeiro. Entre outras pezas, a exposición amosou as ferramentas de tallado da madeira e a caixa que enviou desde o cárcere o albanel monfortino Eusebio Cuesta, os selos que empregaba o guerrilleiro José Castro Veiga «O Piloto», un bandeirín de Radio España Independiente, coñecida como «Pirenaica», varias multicopistas coas que se elaboraba a propaganda clandestina, ou unha carteira de dobre fondo.

REPRESIÓN, RESISTENCIA E DOCUMENTACIÓN SOBRE ESTA ÉPOCA

A exposición estivo organizada en tres bloques. Según explicou Antón Somoza, o primeiro bloque analizou a represión franquista, «dende os primeiros mortos nas cunetas ata as causas militares, os fuxidos e as toupas, ou persoas que se agochaban entre as paredes da súa casa». Somoza destacou o caso de Manolo Becerra, militante da CNT nas minas de Ponferrada, e que estivo oculto na súa casa de As Nogais durante os 40 anos de ditadura. O segundo bloque da exposición versou sobre a guerrilla e a actividade clandestina das organizacións antifranquistas. O terceiro espazo estivo adicado aos recursos multimedia que recolleron datos e información sobre esta época, «como a película editada en Cuba sobre o asasinato de Gayoso e Seoane, dirixentes do Partido Comunista e da guerrilla no ano 48, e que foron sentenciados á pena de morte», explicou Somoza.

O comisario da exposición agradeceu a Carlos Portomeñe por ter cedido esta película para a exposición, así como a todos os particulares e organizacións que prestaron a súa documentación para esta mostra. Entre elas, están a Fundación 10 de marzo, a Fundación Bautista Álvarez de Estudos Nacionalistas, a Fundación Penzol de Vigo e o Proxecto Interuniversitario Nomes e Voces. Somoza lembrou tamén aos cedentes a título individual, como Carlos Portomeñe, Carlos Dafonte, o propio comisario Antón Grande, Javier Rivera, Santos Costa e Manuel Costa.•

Deixa unha resposta

Your email address will not be published.

Nova Anterior

Maribel García encabezará a lista de Espertamonforte! ás municipais de maio

Seguinte Nova

Piden que se declare Festa de Interese Turístico Galego os entroidos de Salcedo e Ribeirao

Últimas noticias sobre ASOCIACIONISMO

A %d blogueros les gusta esto: