• Preto de 3.000 solicitudes recibiu o Rexistro da Deputación para optar aos 248 contratos do plan Ben Empregado!, unha cantidade que aumentará cando se contabilicen as peticións entregadas nos Rexistros doutras administracións e as enviadas por correo postal. Unha vez rematado o prazo de inscrición, foron publicados na páxina web provincial www.deputacionlugo.gal as listas de admitidos e excluídos, para arrancar co proceso de selección, que estará rematado a mediados deste mes de marzo e consistirá na valoración de méritos e do currículo, ademais dunha entrevista. Seguidamente, publicarase a lista de persoas seleccionadas e comunicaráselle ás 221 empresas e entidades sen ánimo de lucro beneficiarias o traballador ou traballadores que lles foron asignados. As propias entidades ocuparanse da súa contratación, cumprindo coa modalidade contractual e pola xornada laboral establecida na solicitude da axuda. O contrato deberá formalizarse na última semana de marzo.•
Cargando ...
