•Este ano, o convidado de honra será o Concello de A Teixeira •Música, charlas, degustacións e promoción centran os actos do Mes de Amandi •O presidente do Atlético de Madrid, Enrique Cerezo, será o pregoeiro desta edición •Durante a celebración da feira, o concello organiza un concurso de selfies, que estarán relacionadas coa viticultura, e a mellor foto recibirá un lote de viños das adegas participantes •O debuxo da alumna do CEIP Virxe do Carme Lisbeth Sánchez Díaz ilustrará as 10.000 pegatinas que se repartirán durante os dous días de feira
• Marzo comeza a tempada de celebracións enolóxicas no sur de Lugo, e en Sober teñen todo listo para a Feira de Amandi, a cita decana do calendario de festexos do viño, e que este ano acada a súa trixésimo quinta edición. A fin de semana do 28 e 29 de marzo terá lugar esta feira emblemática, na que participan 22 adegas, e que terá como pregoeiro a Enrique Cerezo, presidente do Atlético de Madrid e produtor cinematográfico. Según explicou o alcalde de Sober, Luis Fernández Guitián, «Enrique Cerezo é un personaxe destacado e coñecido, e o noso obxectivo é que os pregoeiros poidan difundir todos os nosos tesouros, e cremos que Cerezo pode levar o noso nome e o do noso viño polo mundo enteiro». A lectura do pregón será o domingo 29 ás 13 horas.
O CARTEL DA FEIRA DE AMANDI, PREMIADO NA MOSTRA XANTAR
Dentro da promoción da Feira de Amandi, o cartel anunciador estivo asinado pola monfortina Andrea Rodríguez López, gañadora do concurso convocado a tal efecto polo Concello. Ademais, este deseño recibiu o primeiro premio do V Concurso de carteis de Festas Gastronómicas celebrado o 6 de marzo no marco da feira Xantar, en Expourense. O tirón deste cartel quedou de manifesto nas máis de 15.100 visitas que tivo a imaxe no facebook do Concello de Sober en tan só tres días. Según informaron dende o Concello, o cartel obtivo 268 «Me Gusta» e foi compartido por 182 perfís, entre os que están a páxina do Consorcio de Turismo da Ribeira Sacra ou o Centro do Viño de Monforte.
EN MARCHA O MES DE AMANDI
Como vén sendo tradicional, o Concello de Sober organiza unha serie de actos previos aos días da Feira do Viño, e que baixo a denominación «Mes de Amandi» inclúen eventos musicais, degustacións, charlas e actos promocionais, como a presencia do stand da Feira na mostra Xantar de Expourense, a primeira semana de marzo. O primeiro venres do mes, a sesión das Merendas con Contos, que organiza a Biblioteca Municipal de Sober, estivo adicada ao viño, cunha visita dos nenos e nenas participantes a unha adega de Amandi. A música será a protagonista da xornada do 14 de marzo, cun concerto de arpa a cargo de Olga Benito, organizado en colaboración coas Xuventudes Musicais de Sober, e que inclúe unha degustación de viño de Amandi. A enoloxía terá o seu espazo o día 18, coa xornada técnica «Claves para vender máis e mellor o viño. Marketing do viño», que organiza o Concello coa Estación de Viticultura e Enoloxía de Galicia. O domingo 22, o programa «Come e fala» da Radio Galega retransmitirase en directo desde a Praza do Concello de Sober. As actividades do Mes do Amandi rematan o día 25, data na que a Escola de Hostalería de Rosende acollerá unha xornada de maridaxe de viño de Amandi con merluza do pincho de Celeiro.
ACTOS DA XXXV FEIRA DE AMANDI
A XXXV Feira do Viño de Amandi comezará o sábado 28 de marzo, coa apertura oficial a cargo de Adega Malcavada en lembranza do seu fundador, Antonio Vázquez. Posteriormente, actuará o Grupo de Música Tradicional do Agadic, e xa pola tarde, das 16,30 ata as 19,00 horas a TVG retransmitirá en directo o programa «Aquí Galicia» desde a Praza do Concello, con entrevistas, actuacións de orquestras e humoristas. A continuación, actuará a Banda de Música de Sober e a charanga Madialeva. A precata oficial comezará ás cinco e media, e xa pola noite voltará a música da man do grupo Os Festicultores.
O domingo 29 iniciarase con bombas de palenque e pasarrúas por parte de charangas e da Banda de Música de Sober.
Ás once e media comezará a cata oficial, e tamén a misa solemne coa bendición de ramos na Igrexa de Sober. Ao remate, Enrique Cerezo lerá o pregón da feira. Pola tarde, voltará a música de charangas, e ás sete e media a actuación da orquestra Los Satélites porá fin á xornada festiva.
AMANDI E AS NOVAS TECNOLOXÍAS
Como novidades, o Concello de Sober organiza un concurso de selfies, que deberán realizarse durante os dous días da feira, e relacionados coa viticultura. A persoa premiada recibirá un lote de viños de Amandi. O Concello tamén puxo en marcha un concurso na súa páxina www.facebook.com/concello.desober, no que poderán participar todos os seguidores desta rede social. A persoa que resulte agraciada levará como obsequio un lote de produtos de Amandi.•
Cargando ...
