•Os responsables provinciais explican que con esta actuación «responden ás peticións dos veciños nos Orzamentos Participativos»

• O presidente da Deputación de Lugo, José Ramón Gómez Besteiro, anunciou que o organismo provincial acondicionará a estrada provincial LU-P-1301, que comunica Pedrafita e Seoane do Courel. O titular provincial fixo este anuncio en Pedrafita do Cebreiro a finais do mes pasado, e suliñou que este compromiso «responde ás peticións dos veciños nos Orzamentos Participativos». Según o presidente da Deputación, este investimento na Montaña lucense contribuirá a mellorar as comunicacións entre estes dous municipios.»A Deputación está a facer un esforzo inversor para dar resposta a esta demanda», suliñou.

CARACTERÍSTICAS DESTA ACTUACIÓN

En canto ao calendario desta actuación, Gómez Besteiro anunciou que o organismo provincial xa iniciou os trámites para a ocupación dos terreos necesarios que permitirán mellorar un tramo de preto de 6 quilómetros. «Continuaremos o acondicionamento dende a parte que xa está arranxada ata o final da vía», precisou. Unha vez concluído o proceso de ocupación, a Deputación iniciará os traballos de acondicionamento no tramo comprendido entre os puntos quilométricos 0,00 e o 5,700. Os traballos comezarán co movemento de terras e de muros de contención existentes, para a posterior ampliación da estrada. Unha vez rematados, esta contará con dous carrís de circulación de 3,10 metros, aos que se sumarán arcéns de preto de 1 metro, de xeito que a LU-P-1301 pasará a ter un ancho de 8 metros. Tamén se mellorará o firme mediante o uso de material de drenaxe, dobre capa de aglomerado en quente e sinalización horizontal e vertical, co obxectivo de mellorar a seguridade vial.

RAPOSO: «UNHA MELLORA INDISCUTIBLE PARA OS VECIÑOS DA MONTAÑA»

Na súa visita a Pedrafita do Cebreiro, o presidente da Deputación estivo acompañado polo alcalde deste municipio, José Luis Raposo, quen definiu esta obra como «unha mellora indiscutible para os veciños da Montaña». Según o rexedor, esta mellora non só reducirá os tempos dos desprazamentos entre os concellos de Pedrafita e O Courel e aumentará a seguridade dos seus numerosos usuarios, senón que tamén suporá un enlace directo coa A-6″.•