•A iniciativa de Ecovidrio e Recikla2 busca concienciar de xeito lúdico e técnico sobre a importancia de reciclar correctamente
• O Goberno local do Concello de Sober aceptou a proposta de Ecovidrio e Recikla2 Lugo para a posta en marcha durante a XXXV Feira do Viño de Amandi dun proxecto pioneiro de recollida de vidro. Esta iniciativa pretende informar e concienciar á poboación de forma lúdica e técnica sobre a importancia de reciclar correctamente, con especial atención aos residuos de envases de vidro, neste caso ás botellas que se consumen e ás copas que se empregan.
Sober foi a primeira localidade en poñer en marcha este proxecto, que tamén se desenvolveu na fin de semana seguinte en Quiroga, e continuará nas feiras do viño de Pantón, Cambados, Salvaterra ou O Barco, entre outras.
RECICLAR CORRECTAMENTE, TAMÉN NAS FEIRAS
Según informaron dende o Concello de Sober, o proxecto denominado «De festa con Mr. Iglú» permite aos organizadores incidir en que as copas e vasos de cristal non se depositan no iglú verde. Para proporcionar toda esta información ao público, instalouse durante a fin de semana da Feira de Amandi unha carpa informativa, ademais de contar coa mascota inchable Mr. Iglú, coa que os máis cativos puideron fotografarse. Todas as accións estiveron encamiñadas á correcta ubicación de residuos reciclables nos contedores correspondentes.
Ecovidrio e Recikla2 obsequiaron aos participantes cun tapón de viño estanco e un sacacorchos transparente.
INFORMACIÓN E TAMÉN RECOLLIDA
Ademais de informar, a campaña tivo como misión recoller envases de vidro nos postos e adegas participantes na XXXV Feira do Viño de Amandi. Esta tarefa estivo a cargo da Ecopatrulla de recollida de envases de vidro, que tamén atendeu ás demandas realizadas dende as distintas adegas participantes.•
