JOSÉ LUIS ÁLVAREZ BLANCO REPITE COMO CANDIDATO Á ALCALDÍA DE PANTÓN

O presidente do PP de Lugo, José Manuel Barreiro, anunciou este mes que José Luis Álvarez optará por terceira vez á alcaldía de Pantón. O líder dos populares lucenses valorou o traballo que o rexedor leva desempeñando polos seus veciños e pola localidade nestes oito anos. Barreiro definiu a Álvarez como unha persoa «moi traballadora, seria, comprometida e honesta». Pola súa banda, o rexedor e candidato avanzou que continuará na liña emprendida ata o de agora, escoitando as demandas e peticións dos cidadáns para intentar facelas posibles. «Os veciños e veciñas son a miña prioridade, e solventar as súas necesidades é o meu obxectivo», destacou Álvarez. Nado en Moreda, Pantón, José Luis Álvarez Blanco estivo emigrado en Suiza e traballou como empregado de banca. Formou parte da candidatura do PP de Pantón nas municipais de 2003, e exerceu de tenente de alcalde. Accedeu á alcaldía en 2007, e renovou a maioría absoluta en 2011.•