José Tomé Roca, candidato do Partido Socialista á alcaldía de Monforte de Lemos

 

«Neste momento, Monforte está diante dunha nova ilusión, e se todos remamos na mesma dirección Monforte vai saír adiante»

José Tomé Roca, candidato do PSdeG-PSOE á alcaldía de Monforte, no despacho da Escola de Capacitación Agraria onde desenvolve o seu traballo. EC.
José Tomé Roca, candidato do PSdeG-PSOE á alcaldía de Monforte, no despacho da Escola de Capacitación Agraria onde desenvolve o seu traballo. EC.

 

Repite como cabeza de lista dos socialistas en Monforte. Que novidades presenta para as eleccións de maio?

A candidatura que presentamos dende o Partido Socialista creo que é a máis completa que me leva acompañado na miña traxectoria política. Repite como número dous a miña compañeira Gloria, que nas pasadas eleccións figurou de número catro, unha persoa moi traballadora e de moita valía persoal. As novidades máis importantes están no posto número tres, onde figura Iván Torres Rodríguez, fillo do que foi alcalde de Monforte Celestino Torres, e de número catro vai unha compañeira, Pilar Espinosa Novelle, que é médico de Atención Primaria no ambulatorio de Monforte, e que son digamos dúas caras novas, as máis relevantes que figuran nos primeiros postos da miña candidatura. Son persoas que teñen a súa vida resolta, Iván ten a sorte de ter un despacho de avogados con moito traballo, e Pilar é médica con praza, así que non veñen buscar nada ao Concello, ao contrario, só veñen a aportar, a traballar e por un compromiso persoal conmigo e con Monforte. Van aportar todo o que poidan para tratar de sacar isto adiante.

A súa proclamación como candidato contou coa presencia en Monforte do secretario xeral do PSdeG-PSOE, José Ramón Gómez Besteiro.

A min úneme unha gran amistade e unha relación persoal con José Ramón Gómez Besteiro dende a súa etapa xa no Concello de Lugo, pero estreitada ao longo destes dous mandatos como presidente da Deputación. Nestes oito anos tivemos ocasión de colaborar e traballar moito xuntos, e conseguir cousas para Monforte. Neste sentido, quero dicir que fixo máis por Monforte a Deputación Provincial con 90 millóns de euros de presuposto ao ano que a Xunta de Galicia cun presuposto anual de 10.000 millóns. Polo tanto, o grao de compromiso está ben claro. Que Gómez Besteiro viñera arrouparme na miña presentación para min é un tremendo orgullo, que este compañeiro que ademais non só é o secretario xeral dos socialistas de Galicia senón que vai ser case seguro o próximo presidente da Xunta, para min é un respaldo e un aval moi importante para seguir traballando, e para estar seguro de que Monforte vai seguir tendo o apoio político que necesita fóra.

Na súa proclamación como candidato á alcaldía de Monforte, José Tomé estivo acompañado polo secretario xeral do PSdeG-PSOE, José Ramón Gómez Besteiro; o secretario provincial do partido en Lugo, Juan Carlos González Santín; e membros da súa candidatura ás eleccións municipais de maio. EC.
Na súa proclamación como candidato á alcaldía de Monforte, José Tomé estivo acompañado polo secretario xeral do PSdeG-PSOE, José Ramón Gómez Besteiro; o secretario provincial do partido en Lugo, Juan Carlos González Santín; e membros da súa candidatura ás eleccións municipais de maio. EC.

Dende a súa experiencia de goberno no bipartito de hai 2 mandatos, e logo de 8 anos na oposición, faga unha análise breve de como está Monforte ás portas das municipais.

Lamentablemente, Monforte está paralizado, está vivindo unha parálise económica e social, e polo tanto, Monforte necesita poñelo a andar. Poño como exemplo un coche, que como Monforte está parado, estacionado, e haino que encender e logo intentar poñelo en marcha. Iso é o que necesita Monforte, porque se Monforte continúa pola senda que leva agora mesmo, retrocedemos. De feito, o último ano perdemos máis de 200 habitantes, dende abril do ano pasado a abril deste ano, hai 200 habitantes menos. Polo tanto, estamos en franco retroceso e hai que invertir esta tendencia, porque senón deixaremos de ser ese referente do sur da provincia e do centro de Galicia. Este cruce de camiños entre Ourense e Santiago que sempre foi Monforte non pode perder o seu peso. A situación actual de Monforte é de parálise, de pouca actividade económica, de pouca actividade industrial, o comercio vai aguantando un pouco da economía local pero o comercio solo non pode aguantar sempre. Polo tanto, hai que facer algo para cambiar esta tendencia.

Leva anos en política municipal, tenlle collido o pulso á rúa, na que hai desencanto pola política. Que propoñen os socialistas para convencer á cidadanía de Monforte?

É certo que neste momento hai un desapego á política, e penso que foi ganado a pulso pola maioría dos políticos de todos os partidos, uns máis que outros. O Partido Popular tratou de denigrar a política durante moito tempo, e agora é un problema que lle estallou nas mans. Pero de rebote isto aféctanos a todos. Eu o que noto agora en Monforte é que hai, digamos, unha nova ilusión hacia o Partido Socialista. Estame ocurrindo algo que nunca me tiña ocurrido, e é que moita xente se achega a saludarme, a falar comigo, e che colle a man e dache ánimos. Creo que a xente ve que o futuro de Monforte pasa polo Partido Socialista, e percibo unha nova ilusión neste sentido. Despois de doce anos de goberno do Bloque Nacionalista Galego, onde neste momento, despois dunha etapa de goberno tan longa, o Bloque non ten nada novo que ofrecer, no sentido de que o proxecto está agotado, e non se coñecen novas propostas. O Partido Popular ten claro e está demostrado que non se compromete con Monforte, é dicir, Monforte para o Partido Popular non existe, por non concederlle non lle concede nin un simple obradoiro de emprego. Polo tanto, calquer necesidade ou problema que teña Monforte e que requira dun custe superior, dende logo o Partido Popular non a vai resolver. O Goberno do Partido Popular retrasou todas as obras públicas que tiña en marcha ou que tiña contratadas o Goberno de Emilio Pérez Touriño, polo tanto o que fixeron foi ralentizar todo. Por iso que con Monforte o Partido Popular non ten compromiso, ao contrario. Polo tanto, creo que a xente percibe agora mesmo unha nova ilusión en torno ao Partido Socialista.

Como ve o panorama de opcións políticas cara ás municipais en Monforte?

Previsiblemente, van ser cinco candidaturas as que se presenten por Monforte. Con todo o respecto a cada unha delas, parece que as máis votadas van ser os tres partidos de sempre, o Partido Popular, o Partido Socialista e o Bloque Nacionalista Galego. Nós dende logo aspiramos a ganar estas eleccións. O Partido Popular e a súa candidata non se comprometen con Monforte e cos problemas deste concello, e o Bloque Nacionalista Galego remata unha fase, unha etapa de doce anos onde o seu proxecto está agotado. A nova ilusión que representa para os cidadáns e que aporta propostas concretas é o Partido Socialista, que ademais ten o apoio claro e decidido do presidente da Deputación de Lugo, e dende logo se mañá é o presidente da Xunta de Galicia vai seguir mantendo este apoio a Monforte cun goberno socialista. Penso que neste momento Monforte está diante dunha nova expectativa, dunha nova ilusión, dunha nova esperanza, e estou seguro de que se todos remamos na mesma dirección Monforte vai saír adiante.•

Deixa unha resposta

Your email address will not be published.

Nova Anterior

Arrinca a programación cultural en Ribas de Sil para esta primavera

Seguinte Nova

Lugo foi a sede da II Asemblea Nacional da Federación Rural Galega (FRUGA)

Últimas noticias sobre GALERÍA

     
A %d blogueros les gusta esto: