• Durante os meses de abril, maio e xuño desenvolveranse por toda a provincia de Lugo os Seráns Culturais, unha iniciativa coa que a Área de Cultura da Deputación busca crear unha programación estable ao longo de todo o an, apostando polas industrias culturais galegas con actividades abertas e gratuítas. Según explicou o delegado de Cultura do organismo provincial, Mario Outeiro, durante a presentación deste programa, os Seráns Culturais integran un total de 30 actividades, 20 das cales se desenvolverán no Salón de Exposicións do Pazo de San Marcos, e outras 10 noutros tantos puntos da provincia de Lugo. Na zona sur, as localidades que acollerán estas actividades serán Monforte de Lemos, Sarria, Pantón e A Pobra do Brollón.
ÉXITO DE PÚBLICO NOS EVENTOS DE FEBREIRO E MARZO
Según explicou Mario Outeiro, os actos deseñados para os vindeiros tres meses vén a dar continuidade á programación dos Seráns Culturais de febreiro e marzo, que se completou «con éxito, dada a afluencia continuada de público tanto nas actividades de infantil como de adultos». Os Seráns Culturais inclúen unha ampla programación que vai dende a maxia ata o teatro, pasando polo contacontos, concertos ou obradoiros.
SERÁNS CULTURAIS DE ABRIL EN MONFORTE E PANTÓN
A programación dos Seráns Culturais no sur de Lugo iniciarase o sábado 18 de abril en Monforte. Na Casa da Cultura e a partir das 20,00 horas, o dúo A Quenlla ofrecerá un concerto para presentar o libro-CD «Desorballando outonos», que recolle a homenaxe destes músicos e da Asociación Cultural Xermolos de Guitiriz á figura de Xosé María Díaz Castro, a quen se lle adicou o Día das Letras Galegas do ano pasado. Según precisou o delegado de Cultura da Deputación, «Desorballando outonos» é unha «confluencia de música e palabra na que poderemos gozar da enorme verba do poeta, pegada á xente, á natureza, á expresión viva, existencial e humana». A Quenlla tamén ofrecerá este concerto en Mondoñedo, o día 11 de abril, e en Lugo, o 8 de maio.
A programación dos Seráns Culturais continuará o sábado 25 de abril en Pantón. A partir das 19,30 horas, a Praza do Concello acollerá o espectáculo «Onde está o Mago Antón?», dirixido a todos os públicos.
SARRIA E BROLLÓN, OS ESPECTÁCULOS DE MAIO
O Mago Antón levará o seu espectáculo a Sarria, o venres 15 de maio, cunha sesión que terá lugar na Praza da Vila ás 20,00 horas.
O teatro será o protagonista dos Seráns Culturais na Casa da Cultura Olga Novo de A Pobra do Brollón. O sábado 16 de maio, a partir das 20,30 horas, a compañía Ibuprofeno Teatro porá en escena a obra «O Furancho», destinada a público adulto. Según explicaron os responsables da programación, o Furancho é unha nova aposta empresarial que cheira a éxito a pesar do contexto hostil no que vivimos, un espazo cheo de «agroglamour»no que se fusiona o trendie coa máis pura tradición, os zocos cos pololos e o loureiro coas novas tecnoloxías.
CONCERTO LÍRICO EN MONFORTE SOBRE AS PAISAXES DE MANUEL MARÍA EN XUÑO
A programación dos Seráns Culturais para estes meses culminará en Monforte o venres 26 de xuño. A partir das 20,30 horas, a Casa da Cultura monfortina será o escenario do concerto «O Eco do Poeta. Manuel María», que ofrecerá o grupo vocal Sólo Voces. Este será un concerto cargado de lirismo no que «O eco do poeta» viaxa dende a Terra Chá nas composicións de Eliseo García-Bouso, quen asumiu o desafío de recrear musicalmente as paisaxes que o poeta tanto amou.•
Cargando ...
