• Os taekwondistas do club Neka de Monforte veñen de colleitar novos éxitos na súa participación no Open de España, celebrado en Pontevedra o pasado 11 de abril
TRES CLASIFICADOS PARA ESTAR NA SELECCIÓN GALEGA O VINDEIRO CAMPIONATO DE ESPAÑA
Esta importante cita deportiva, que contou con participantes de varios países, conta cun alto nivel de competición, xa que habilita aos medallistas para acceder ao Campionato de España. Deste xeito, o club Neka terá presencia no combinado galego que disputará a gran proba nacional no mes de maio, grazas ao bronce acadado polo trío junior de Carlos Rey, Samuel López e Álex Camba. Esta medalla clasifícaos directamente para integrar a selección galega no vindeiro Campionato de España.
BO PAPEL DOS PARTICIPANTES DO CLUB NEKA
Ademais deste podio, cabe destacar o bo papel do trío cadete formado por Cristian Castro, José Roca e Brais Rodríguez, que completaron a súa participación no Open de España cun destacado quinto posto. En categoría individual, Sabela González e Meritxell Varela realizaron un bo traballo na primeira ronda, deixando atrás a máis de qunice competidoras, aínda que non foi suficiente para proseguir en competición. O adestrador do Neka, José Mª Vega, valorou moi positivamente o esforzo e a competitividade dos seus deportistas. «Logo desta importante proba, estamos a traballar a tope para o Campionato de España», suliñou Vega, satisfeito porque o taekwondo monfortino teña xa garantida a súa presencia no combinado que representará a Galicia nesta competición. «O trío de Carlos Rey, Samuel López e Álex Camba xa están dentro por ter medalla, e iso é un logro moi importante para estes rapaces, e moi satisfactorio para o club», suliñou.•
