•Esta iniciativa, impulsada dende a Deputación, acada este ano a súa terceira edición como foro de referencia en cultura dixital
• O Pazo de San Marcos de Lugo será a sede do congreso #InLugo15, un foro de referencia en cultura dixital e redes sociais que a Deputación de Lugo organizará os días 8 e 9 de maio. Este evento, un dos máis destacados en Galicia e a nivel nacional, acada este ano a súa terceira edición.
ACHEGAR O USO DAS NOVAS TECNOLOXÍAS A TODA A POBOACIÓN
Según explicaron a vicepresidenta segunda da Deputación, Lara Méndez, e o director de Fondos Europeos do organismo provincial, Pablo Rivera, este foro ten como obxectivo fomentar o uso da rede e das novas tecnoloxías entre todos os sectores da poboación, e reflexionar sobre o papel das mesmas na sociedade actual. Méndez destacou que «a Deputación leva oito anos apostando polas TIC como elemento motor de desenvolvemento, e un encontro tecnolóxico das características deste é, ademais, un escaparate de excepción para a promoción económica e turística da provincia e de Galicia». Según explicaron os responsables deste congreso, a repercusión do evento está a ser moi importante. O #InLugo vén conseguindo en cada edición ser «trending topic» en Twitter, o que supón unha gran proxección da provincia e do talento lucense.
CONTIDOS DO CONGRESO #INLUGO15
Como nas edicións anteriores, o #InLugo15 integra unha ampla programación que inclúe relatorios, debates e ponencias, nas que participan destacadas figuras do eido das novas tecnoloxías e redes sociais. O congreso #InLugo será o escenario no que os expertos avaliarán os cambios de hábitos, mentalidades, formas de comunicación e estilos de vida que está provocando Internet na sociedade dos nosos días, dende puntos de vista como a seguridade dixital, o dereito na rede, o márketing online ou o éxito dos novos medios xurdidos ao seu abeiro.
NOVAS TECNOLOXÍAS E MEDIOS DE COMUNICACIÓN, ENTRE OUTROS TEMAS
Entre os expertos que participarán no #InLugo15 están Ignacio Escolar, exdirector do diario Público e na actualidade director dun xornal dixital referente en España, @eldiarioes, que será o encargado de abrir o evento. Na súa conferencia, Escolar compartirá a súa experiencia liderando un dos proxectos dixitais máis exitosos do noso país e reflexionará sobre os desafíos que afrontan os medios nun panorama de comunicación completamente novo.
O #InLugo tamén contará coa participación de David Varona (@davarona), redactor xefe de proxecto, participación e social media en RTVE; David Lombao (@davidlombao), director do xornal dixital Praza Pública; Andrés Milleiro (@juanmilleiro), director de Social Media de NH Group; ou Víctor Tasende (@victortasende), deportista, blogueiro e protagonista dunha asombrosa historia de superación. O cadro de relatores irase ampliando ata completar unha listaxe de preto de 30 nomes.
EMPRENDEMENTO NA REDE
Este ano tamén ocupará un espazo significativo no congreso #InLugo15 a presentación de empresas, iniciativas e proxectos relacionados coa rede que se están a levar a cabo na nosa provincia e que triunfan grazas aos medios sociais. Así, Idoia Cuesta, artesá vasca establecida na provincia que vén de recibir o Premio Nacional de Artesanía, dará conta da súa experiencia emprendedora, entre outros invitados.
PREMIOS INLUGO A PROXECTOS LUCENSES NO ÁMBITO DIXITAL
Ao remate do congreso, terá lugar a tradicional entrega dos Premios InLugo. Estes galardóns, que teñen como obxectivo recoñecer o labor e o empeño posto por empresas e proxectos lucenses no ámbito dixital, premiará proxectos nas categorías de Comercio, Ocio e Restauración; Educación e Formación; Cultura e Acción Social; e Tecnoloxía.
Os interesados en participar nestes premios deberán presentar as súas candidaturas ata o vindeiro 5 de maio ás 20,00 horas, a través da páxina web inlugo.com. Rematado o prazo, un xurado técnico valorará as candidaturas recibidas e elixirá o gañador de cada categoría. A cerimonia de entrega dos galardóns celebrarase ás 19,30 horas do 9 de maio.
INSCRICIÓN GRATUÍTA NO CONGRESO
O congreso #InLugo15 ofrece 200 prazas, que poden conseguirse de xeito gratuíto nas webs www.inlugo.com ou www.deputacionlugo.gal, ata completar aforo. O desenvolvemento das xornadas poderá seguirse nas redes sociais co hashtag #inlugo15, e en directo, vía streaming, en www.deputacionlugo.gal. Todas as novidades están dispoñibles en www.inlugo.com, www.deputacionlugo.org, @in_lugo e en https://www.facebook.com/CongresoInLugo.•
Cargando ...
