A DEPUTACIÓN AMPLIOU AS AXUDAS AOS PRODUTORES DE LEITE

O organismo provincial aprobou unha liña de axudas para o sector gandeiro, dotada con 200.000 euros, para impulsar o rural e o sector primario na provincia de Lugo. O voceiro socialista na Deputación, Manuel Martínez, destacou que a convocatoria «responde ás peticións realizadas polos veciños nos Orzamentos Participativos 2015, que estamos na obriga de convocar e e executar no ano actual, tendo en conta ademais a delicada situación do sector». As axudas destinaranse a subvencionar actividades de funcionamento e organización de produtores de leite, de xeito que poidan contar con persoal e recursos suficientes e de calidade para evitar o desequilibrio entre produtores e industrias no novo escenario tras a desaparición das cotas. O sistema de concesión será o de concorrencia non competitiva, de xeito que ningún dos futuros beneficiarios perciba menos do 20% do orzamento total.•