• Esta iniciativa da Vicepresidencia da Deputación busca «implicar á poboación local no desenvolvemento económico e social do territorio en base aos recursos endóxenos»
• O pasado 22 de abril, o telecentro de Chantada acolleu o encontro correspondente á primeira fase do proxecto Localidade, posto en marcha dende a Vicepresidencia da Deputación para impulsar a dinamización local. Axentes sociais e representantes do tecido asociativo de Chantada participaron nunha reunión na que os responsables provinciais deron a coñecer as características do proxecto Localidade.
ARTELLAR UN PROXECTO DE DESENVOLVEMENTO DENDE DENTRO
O obxectivo fundamental desta iniciativa é implicar á poboación local e aos colectivos da zona no desenvolvemento do municipio.
Según explicou o vicepresidente da Deputación, Antonio Veiga, na presentación do proxecto Localidade, o medio rural constitúe «un espazo de oportunidades e posibilidades con escaso aproveitamento das mesmas actualmente», e busca artellar unha «proposta de desenvolvemento dende a propia zona a través dos colectivos e asociacións de cada zona na que se intervén». O proxecto Localidade arrincou simultaneamente nos concellos de Chantada, Mondoñedo e Guitiriz. Veiga destacou que un dos piares básicos deste proxecto é «fomentar e potenciar a participación cidadá na toma de decisións e a corresponsabilidade da poboación no desenvolvemento municipal».
DATOS PARA ANALIZAR A SITUACIÓN DE CADA CONCELLO
Os resultados desta primeira fase do proxecto Localidade serán unha radiografía da situación real da sociodemográfica do municipio, un mapa do tecido asociativo do concello, e un catálogo de recursos que recolla as potencialidades existentes na actualidade no municipio, tanto de iniciativa pública como privada.
PROXECTO EN TRES FASES
O proxecto Localidade ten como primeira fase a diagnose e análise da realidade municipal. Así, detéctanse as necesidades e demandas dos colectivos asociativos como do territorio, grazas ao contacto de primeira man con todas as asociacións e colectivos. Con estes datos, pode elaborarse un mapa de recursos endóxenos e de potencialidades cos que conta esa localidade para o seu desenvolvemento.
A segunda fase consistirá na elaboración dun Plan de Actuación para o desenvolvemento municipal en base aos recursos endóxenos existentes, e que terá en conta as propostas presentadas.
A terceira e última fase centrarase na posta en marcha das actuacións e proxectos propostos. Esta fase levarase a cabo grazas á colaboración do Concello e a Deputación.•
Cargando ...
