•En resposta ás peticións veciñais nos Orzamentos Participativos

• O 8 de maio, a Xunta de Goberno da Deputación aprobou un convenio, asinado por Deputación e Asociación de Empresarios da Construción de Lugo, para crear o primeiro banco de vivendas abandonadas da provincia. Esta é unha das medidas que a Deputación ten que executar este ano, posto que dá resposta a unha das cuestións máis demandadas polos veciños nos Orzamentos participativos, como é o impulso da rendabilidade do medio rural e do sector primario para crear emprego e atallar o despoboamento fixando poboación no rural.
Según explicaron os responsables provinciais, este convenio permitirá dar o primeiro paso para a creación de dito banco, coa realización dun estudo das vivendas abandonadas na provincia para determinar o seu número, onde se sitúan e, especialmente, cales son as causas dese abandono e corrixilas. Estes datos permitirán desenvolver estratexias e programas específicos.
Este convenio fomentará tamén a actividade empresarial e a xeración de emprego na industria da construción, reorientándoa cara a rehabilitación enerxética e sostible, a través do Programa de Impulso da Rehabilitación Enerxética e Sostible na provincia de Lugo.
O convenio busca tamén ofrecer formación aos traballadores do sector para actualizar as súas competencias profesionais. Asimesmo, poranse en marcha campañas para amosar a cidadáns e profesionais as vantaxes da eficiencia enerxética nos fogares.•