•Alumnado da Escola Oficial de Idiomas de Monforte mellora a súa competencia nestas linguas con obradoiros de cociña e conversas con nativos residentes na comarca
• Nada mellor para aprender un idioma que entrar ata a cociña do país e, se é posible, falar e comer con nativos. Sobre este principio, a Escola Oficial de Idiomas de Monforte propuxo ao seu alumnado diversas experiencias lúdicas e culturais que lles permiten mellorar as súas competencias lingüísticas no idioma estudiado dun xeito dinámico e divertido.
CONFERENCIA-LABORATORIO DE COCIÑA ITALIANA
O pasado 23 de abril, o Departamento de Italiano da Escola de Idiomas organizou unha conferencia-laboratorio sobre cociña italiana, impartida por Chiara Maria Lazzaretto, e dirixida aos alumnos e alumnas que estudian a lingua de Dante. Durante a sesión, os estudiantes puideron participar na preparación de platos típicos de Italia que non precisan cocción. Por último, degustaron as receitas elaboradas e comentaron, por suposto en italiano, a súa valoración do resultado.
EXCURSIÓN RURAL EN ALEMÁN
Tamén o día 23 do mes pasado, o Departamento de Alemán da Escola de Idiomas de Monforte organizou para os alumnos e alumnas desta lingua unha excursión á Casa das Flores, situada na parroquia soberina de Mer, e que está rexentada por unha familia alemá. Na xornada, os estudiantes participaron por unhas horas dunha experiencia de inmersión lingüística no idioma de Goethe, tomando parte en actividades cotiás. A través dun obradoiro de cociña típica alemá, os estudiantes coñeceron a receita e o sabor do afamado pastel de ruibarbo, e disfrutaron dunha visita guiada polo precioso xardín desta finca.•
