•A deputada socialista Concepción Burgo denunciou que “o servizo do HULA está aberto 35 horas á semana e 133 horas pechado, o 60% dos casos de infarto teñen que ser atendidos na Coruña”

• Os socialistas lucenses veñen de denunciar que no Pleno do Parlamento de Galicia, celebrado o 29 de abril, o Partido Popular rexeitara unha proposición non de lei dos socialistas galegos na que instaban ao Goberno galego a aceptar o ofrecemento da Deputación de Lugo, formalizada a través do seu presidente, José Ramón Gómez Besteiro, de que sexa a institución provincial a que financie o servizo hemodinámica 24 horas no Hospital de Lugo (HULA).

BURGO: “A INACCIÓN DA CONSELLERÍA É ALARMANTE”
A raíz desta situación, a deputada socialista, Concepción Burgo, criticou que “a inacción e a negativa da conselleira de Sanidade e de Feijóo son alarmantes cando falamos da saúde das persoas”, e fixo referencia ás demandas de colectivos veciñais, sindicatos, partidos políticos e cidadáns de Lugo. A deputada lucense alertou de que “o servizo de Hemodinámica no HULA está aberto 35 horas á semana e 133 horas pechado, o 60% dos casos de infarto teñen que ser atendidos na Coruña, e os datos do INE reflicten que en Lugo 76 de cada 100.000 falecementos son por infarto, o dobre da media española”.
A deputada socialista lamentou que “mentres o PP dá explicacións falsas os lucenses morren. Burgo criticou que os populares “impiden que a Deputación aporte os 100.000 euros ao ano necesarios para ter aberto o servizo as 24 horas, e din non a esta posibilidade por intereses escuros”. “Feijóo e o PP non só demostran que non poñen os servizos necesarios para a sanidade luguesa, senón que están impedindo que estos estean no HULA agora que hai a posibilidade orzamentaria real de poñelos en marcha”, engadiu Burgo.
A socialista lamentou a “insensibilidade e irresponsabilidade de Feijóo cos lucenses, ao incumprir as promesas reiteradas”, e instoulle a “deixar de mentir ao afirmar que os especialistas non recomendan o servizo de Hemodinámica 24 horas”. Burgo advertiu que “os socialistas galegos e os veciños de Lugo vamos a seguir loitando polos nosos dereitos”.•