• A Concellería de Cultura de Monforte está a desenvolver un intenso programa de actos para conmemorar o Día das Letras Galegas durante todo o mes.
EXPOSICIÓN, RUTAS E LITERATURA
Ata o día 29 deste mes pode verse na Casa da Cultura Poeta Lois Pereiro a mostra «Terra e letras de Lemos: 17 olladas», de J.M. Rodríguez, e que ademais ofrece a oportunidade de percorrela con visitas guiadas.
Ademais, organízanse dúas rutas culturais para afondar nos segredos da historia e do patrimonio cultural da cidade do Cabe. As Rutas Histórico-Literarias por Monforte están orientadas ao alumnado de Secundaria dos centros de ensino da cidade, pero tamén abertos ao público en xeral. O alumnado de Primaria poderá disfrutar ao longo deste mes da Ruta Coñece Monforte.
A Biblioteca Municipal organizou unha nova edición do Certame de Narración e Debuxo Infantil Letras Galegas, baixo o tema «Da ciencia á ficción: O home na lúa, os robots, a realidade virtual, etc».
A programación contará coa presentación do libro «Amadeo Goyanes e as zanfoneiras de Monforte», o sábado 16 de maio na Praza de Abastos.
Este espazo tamén acollerá, na fin de semana das Letras Galegas, o Mercado das Letras e das Flores, o sábado 16 de 10,30 a 14,00 e de 17,00 a 20,00, e o domingo 17 de 10,30 a 14,00 horas. O domingo 17 de maio, Día das Letras Galegas, o cantautor Emilio Rúa actuará na Praza de Abastos ás 12,00 horas.
OBRADOIRO INFANTIL E TEATRO
Ademais, o xoves 21 terá lugar ás seis na Biblioteca Municipal o obradoiro «Imos xogar con Filgueira Valverde», para nenos e nenas de 6 a 12 anos. Haberá teatro o venres 29, coa obra «Bestiario», a cargo da compañía Teatro Lila, a partir das oito na Casa da Cultura.•
