•Os participantes destacaron o potencial deste complexo para dinamizar a actividade económica da provincia
• As instalacións do complexo de Augas Mestas, no municipio de Quiroga, acolleu o pasado 21 de maio unha xornada sobre proxectos europeos, organizada polo Eixo Atlántico e a Deputación de Lugo. Este encontro supón o comezo dunha nova etapa na actividade deste complexo que, según os responsables provinciais, estará totalmente dispoñible para o seu disfrute xa neste verán.
«INNUMERABLES POSIBILIDADES» TURÍSTICAS E PARA ORGANIZACIÓN DE EVENTOS
A xornada do día 21 estivo centrada nos programas europeos do Eixo Atlántico no periodo 2014-2020, e contou coa participación dunha vintena de técnicos encargados de xestionar fondos europeos en entidades locais integradas no Eixo.
Na presentación da xornada, a deputada Sonsoles López Izquierdo destacou as «innumerables posibilidades» do complexo de Augas Mestas «non só dende o punto de vista turístico senón como escenario para a celebración de eventos como a xornada do Eixo, moi pertinente posto que a súa posta en valor foi posible grazas a fondos eurpeos».
O EIXO CELEBRARÁ MÁIS EVENTOS EN AUGAS MESTAS
Pola súa banda, o Secretario Xeral do Eixo Atlántico, Juan Vázquez Mao, fixo fincapé no potencial de Augas Mestas para dinamizar a actividade económica da provincia, de cara a ofrecer un turismo de natureza; o de rutas fluviais ou mesmo integrarse no turismo xacobeo como parte do Camiño francés e o Camiño portugués, procedente do país veciño. Asimesmo, avanzou a intención do Eixo Atlántico de celebrar máis eventos en Augas Mestas no futuro.
A Deputación aprobou a concesión, por 25 anos, do complexo de Augas Mestas, que entrará en uso a finais deste mes logo de máis de 10 anos sen actividade. O organismo provincial continúa executando reformas en Augas Mestas, financiadas con fondos europeos, para adaptalo á normativa vixente.•
