•A Federación Rural Galega (FRUGA) presentou un manifesto «en defensa do sector lácteo galego» nun acto público en Lugo
• Logo da desaparición das cotas lácteas, os produtores galegos están a sufrir as consecuencias da liberalización do mercado, situación que está poñendo en risco a viabilidade de moitas explotacións gandeiras en Galicia. Na nosa provincia, esta situación foi denunciada por diversos colectivos, entre eles a Federación Rural Galega (FRUGA), que vén de dar visibilidade a este malestar cun acto público, celebrado o pasado 14 de maio en Lugo.
A CONCENTRACIÓN CONTOU CO APOIO DO BNG DE LUGO
Esta concentración, convocada por este colectivo agrogandeiro e polo BNG, contou coa presencia do coordinador de sectores gandeiros de FRUGA, Elías Somoza, do deputado autonómico do BNG por Lugo, Cosme Pombo, e do voceiro do BNG na Deputación de Lugo, Mario Outeiro. Durante este acto, tivo lugar a lectura dun manifesto, por parte de FRUGA, en defensa do sector lácteo galego, no que insistiron en que «o Goberno galego debe pasar das verbas aos feitos, dando solución á agonía á que está conducindo ao sector lácteo».
UN SECTOR ESTRATÉXICO QUE PRECISA «MEDIDAS EXCEPCIONAIS»
Neste manifesto, os responsables de FRUGA demandaron a creación dunha plataforma en defensa do leite galego, «na que estean representados todos os ámbitos económicos e sociais implicados, dende os produtores ata a industria, contando tamén co conxunto do rural». Ademais, lembraron que «o sector lácteo é un sector estratéxico da economía galega e precisa medidas excepcionais, como se ten feito con outros sectores».
Os asinantes insistiron en que «este é un manifesto urxente, porque o sector atópase nunha situación límite», e suliñaron que esta actividade «é fundamental na economía de moitas comarcas lucenses».•
